Туркия суди мухолифатдаги Республика Халқ партияси (CHP) етакчиси Истанбул мэри Экрем Имомоғлуни яна бир ҳибсга олиш ордерини чиқарди. Туркиянинг Анадолу ахборот агентлиги хабар беришича, у «сиёсий жосуслик»да гумон қилинмоқда. Имомоғлу эса барча айбловларни рад этади.
Истанбул суди Имомоғлу билан бирга Теле1 янгиликлар каналининг бош муҳаррири Мердан Янардаг ва мэрнинг маслаҳатчиси ва сайловолди ташвиқоти менежери Нежати Ўзканни ҳам ҳибсга олди.
Суд қарорига кўра, Экрем Имомоғлу ва Нежати Ўзкан 2019 йилги сайловларда фирибгарлик йўли билан устунликка эришишни режалаштиришган. Улар ижтимоий тармоқлар ва сайловчиларнинг ички электрон почталарига киришга уринишган, натижада маълумотлар сизиб чиққан. Прокурорларнинг сўзларига кўра, улар фуқароларнинг шахсий маълумотларини хорижий разведка агентликларига ўтказган.
«Созcу» газетасининг хабар беришича, суд қарори июль ойида жосуслик айбловлари билан ҳибсга олинган Ҳусайн Ғуннинг кўрсатмалари билан тасдиқланган. У террористик ташкилотларни молиялаштиришда айбланган. Суд ҳужжатлари унинг Нежати Ўзкан билан алоқаларни сақлаб қолганлигини кўрсатади. Тергов маълумотларига кўра, Мердан Янардаг «Гун» қўл остида Теле1 бош муҳаррири бўлган ва канал фаолиятини ўз манфаатларига мос равишда шакллантирган.
Экрем Имомоғлу шу йилнинг март ойида ҳибсга олинган. Июль ойида у давлат амалдорини ҳақорат қилишда айбланиб, бир йилу саккиз ойлик қамоқ жазосига ҳукм қилинган. Имомоғлуга қарши коррупция иши ҳам қўзғатилган. Март ойидан бери Туркияда тахминан 500 киши ҳибсга олинган, уларнинг аксарияти CHP аъзолари, жумладан, Истанбул, Анталия, Бурса, Чаноққалъа, Гиресун ва Трабзон шаҳарлари ҳокимлари ва шаҳар амалдорларидир.
