Бугун, 22 июнь куни Ўзбекистон Республикаси Президенти Шавкат Мирзиёев мамлакатдаги дипломатик миссиясини якунлаётган Озарбайжон Республикасининг Фавқулодда ва мухтор элчиси Гусейн Гулиевни қабул қилди. Бу ҳақда Президент матбуот хизмати хабар берди.
Билдирилишича, давлат раҳбари Озарбайжон элчисининг самарали фаолияти ҳамда икки мамлакат ўртасидаги стратегик шериклик ва иттифоқчилик муносабатларини ривожлантириш ва мустаҳкамлашга қўшган шахсий ҳиссасини алоҳида қайд этган.
Олий ва бошқа даражаларда жадал мулоқотлар йўлга қўйилган. Савдо-иқтисодий ҳамкорликни ривожлантиришда сезиларли натижаларга эришилган: сўнгги йилларда ўзаро товар айирбошлаш ҳажми каррасига ошган, Озарбайжон сармояси иштирокида 280 та корхона ташкил этилган, Қўшма инвестиция компанияси таъсис қилинган.
Айни пайтда геология, қишлоқ хўжалиги, транспорт, шаҳарсозлик, тўқимачилик, фармацевтика ва бошқа тармоқлардаги кооперация лойиҳалари фаол паллага кирган.
Маданий-гуманитар алмашинув соҳасида ҳам муҳим дастурлар амалга оширилмоқда.
Учрашув якунида давлат раҳбари элчи Гусейн Гулиевга Ўзбекистон билан Озарбайжон ўртасидаги кўп қиррали муносабатларини мустаҳкамлашга қўшган катта ҳиссаси учун “Меҳнат шуҳрати” орденини топширган.
Элчи, ўз навбатида, унинг дипломатик миссиясига берилган юксак баҳо ҳамда Ўзбекистон ва Озарбайжон ўртасидаги кенг кўламли ҳамкорлик ривожини ҳар томонлама қўллаб-қувватлаётгани учун мамлакат етакчисига чуқур миннатдорлик билдирган.
