Ўзбекистон Президенти Шавкат Мирзиёевнинг амакиваччаси, Совет Иттифоқи қаҳрамони Ўринбек Ёқубов Одер дарёсини кесиб ўтиш чоғида 20 дан ортиқ аскар ва офицерни йўқ қилган ҳамда вермахтнинг 7 та контрҳужумини қайтаришда ёрдам берган. Бу ҳақда ТАСС танишган архив ҳужжатларида келтирилган.
Қайд этилишича, Ёқубов 31-ўқчи дивизияси 248-ўқчи полки миномётчилар ротаси ҳисоби командири бўлган. 1944 йил февраль ойида Днепр дарёсини кесиб ўтишда миномёт ёрдамида уч кун давомида 15 та контрҳужумини қайтаргани учун Совет Иттифоқи қаҳрамони унвонини олган.
1945 йилнинг апрелида Ёқубов Қизил Юлдуз ордени билан тақдирланган. Орден бериш ҳақидаги мукофот варақасида шундай дейилади:
“1945 йил 24 январда Штейне қишлоғидан ғарбда Одер дарёсини кесиб ўтиш пайтида ўртоқ Ёқубов ўз миномётлари билан ўқчиларни қўллаб-қувватлаб, уларга дарёни муз устидан кесиб ўтиш ва плацдармни эгаллашга ёрдам берди. Ўқчилар ортидан миномётларини ғарбий қирғоққа ўтказган Ёқубов икки кун давомида пиёдаларга душманнинг 7 та шиддатли контрҳужумини қайтаришда ёрдам берди. Ушбу жангларда у миномёт олови билан душманнинг 2 та ўт очиш нуқтасини ҳамда 20 дан ортиқ аскар ва офицерини йўқ қилди”.
Шунингдек, Ўринбек Ёқубов “Жасорат” ва “Кавказ мудофааси учун” медаллари билан ҳам тақдирланган.
Маълумот учун, вермахт – 1935-1945 йилларда нацистлар Германиясининг расмий қуролли кучлари номи бўлган. У 1935 йилда Рейхсвернинг ўрнига ташкил этилган ва Иккинчи жаҳон урушида Германиянинг асосий ҳарбий кучи сифатида ҳаракат қилган. 1945 йилда Германия мағлубиятга учрагач, иттифоқчилар томонидан тарқатиб юборилган.
