Тбилиси шаҳрида 2 июль куни Шавкат Мирзиёевни расмий кутиб олиш маросими ўтказилди. Давлат раҳбарини мамлакат президенти Михаил Кавелашвили кутиб олди.
Қароргоҳ олдидаги майдонда икки давлат байроқлари кўтарилиб, фахрий қоровул саф тортди. Ўзбекистон ва Грузия давлат мадҳиялари янгради. Етакчилар ҳарбий оркестр садолари остида фахрий қоровул сафи олдидан ўтиб, расмий делегациялар аъзолари билан саломлашди. Шундан сўнг улар биргаликда суратга тушди.
Расмий кутиб олиш маросимидан кейин Орбелиани саройида Шавкат Мирзиёев ва Михаил Кавелашвилининг музокаралари бўлиб ўтди.
Учрашувда Ўзбекистон—Грузия кўп қиррали муносабатларини янада ривожлантириш масалалари муҳокама қилинди. Давлат раҳбари Грузия Президентига самимий меҳмондўстлик учун миннатдорлик билдириб, Ўзбекистон президентининг ушбу мамлакатга давлат ташрифи сўнгги 23 йилда илк бор амалга оширилаётганини алоҳида таъкидлади.
Томонлар парламентлар, ҳукуматлар ва ишбилармон доиралар ўртасидаги алоқалар фаоллашганини мамнуният билан қайд этди. Ўтган йил якунларига кўра, икки давлат ўртасидаги товар айирбошлаш ҳажми 270 миллион долларга етгани, қўшма лойиҳа ва корхоналар сони ортиб бораётгани таъкидланди. Ўзбекистонда Грузиянинг биринчи рақамли банки — TBC муваффақиятли фаолият юритмоқда. Шунингдек, Тошкент билан Тбилиси ва Батуми шаҳарлари ўртасида тўғридан тўғри авиақатновлар йўлга қўйилган, жорий-йил март ойида эса Тошкентда Грузия маданияти кунлари ўтказилган.
Музокараларда ўзаро савдо ҳажмини, жумладан, Поти ва Батуми портлари салоҳиятидан самарали фойдаланиш орқали янада ошириш масалаларига алоҳида эътибор қаратилди. Фармацевтика, кимё саноати, қишлоқ хўжалиги, транспорт, энергетика, рақамли технологиялар ҳамда туризм соҳаларида ҳамкорликни ривожлантириш имкониятлари муҳокама қилинди. Шунингдек, ишбилармонлик, туристик ва гуманитар алмашинувларни кенгайтириш мақсадида ҳудудлар ўртасидаги алоқаларни ривожлантириш муҳимлиги таъкидланди.
Учрашув якунида Шавкат Мирзиёев Грузия президенти Михаил Кавелашвилини Ўзбекистонга ташриф билан келишга таклиф этди.
Шундан сўнг Тбилисидаги тадбирлар доирасида Ўзбекистон президентини Грузиянинг олий давлат мукофоти — “Олтин мўйна” ордени билан тақдирлаш маросими бўлиб ўтди.
Грузия президенти Михаил Кавелашвили Ўзбекистон—Грузия кўп қиррали муносабатларини ривожлантиришга қўшган улкан ҳиссаси учун давлат раҳбарига ушбу юксак мукофотни топширди.
Шавкат Мирзиёев Грузия президенти Михаил Кавелашвили, бош вазири Ираклий Кобахидзе ҳамда Парламент раиси Шалва Папуашвилига юксак мукофот учун миннатдорлик билдириб, дўст Грузия халқига тинчлик, фаровонлик ва равнақ тилади. Шунингдек, давлат раҳбари Орбелиани саройининг Фахрий меҳмонлар китобига самимий тилакларини ёзиб қолдирди.
Маълумот учун, “Олтин мўйна” ордени 1998-йилда таъсис этилган бўлиб, Грузиянинг олий давлат мукофотларидан бири ҳисобланади. У хорижий давлатлар ва халқаро ташкилотлар билан алоқаларни мустаҳкамлаш, шунингдек, грузин маданияти, илм-фани ва санъатини тарғиб этиш йўлидаги алоҳида хизматлари учун берилади.
Орден номи қадимги юнон афсонасидаги Олтин мўйна ҳамда ҳозирги Грузия ҳудудида жойлашган тарихий Колхида ўлкаси билан боғлиқ.
Турли йилларда мазкур мукофот Буюк Британия қироличаси Елизавета II, Иордания подшоҳи Абдулла II, Германиянинг собиқ канцлери Герхард Шрёдер, Туркия президенти Ражаб Тоййиб Эрдўғон, Озарбайжоннинг собиқ президенти Ҳайдар Алиев ва бошқа хорижий давлат арбобларига топширилган.
