АҚШ Венесуэла соҳиллари яқинида йирик нефть кемасини қўлга олди. Бу ҳақда икки нафар америкалик амалдор “Reuters” нашрига берган интервьюсида сўз очди.
Манбаларнинг айтишича, операцияни АҚШ Соҳил қўриқлаш хизмати амалга оширган. Танкернинг номи ва аниқланган жойи ошкор этилмаган.
АҚШ Президенти Дональд Трамп операцияни тасдиқлаган.
“Ҳарбийлар Венесуэла қирғоқларида жуда катта танкер, жуда улкан, илгари ҳеч қачон қўлга олинмаган даражадаги энг йирик кемани қўлга олди”, дея ўз ҳайратларини яширмаган Трамп.
Ушбу қўлга олиш АҚШнинг минтақадаги ҳарбий мавжудлиги ортиб бораётган бир пайтда рўй берди. Ноябрь ўрталарига келиб, ҳудудда жойлаштирилган америкалик ҳарбийлар сони 15 минг нафарга етди.
2020 йил баҳорида АҚШ Адлия вазирлиги Венесуэла етакчиси Николас Мадуро ва республиканинг бир қатор юқори мартабали амалдорларини “наркотерроризм”да айблаган эди.
2025 йил кузида Кариб минтақасидаги кескинлик АҚШ томонидан амалга оширилган бир қатор ракета ҳужумларидан кейин ошди. Вашингтоннинг таъкидлашича, ҳужум қилинган кемалар наркокартеллар контрабанда учун фойдаланаётган транспорт воситалари бўлган.
Сентябрь бошидан бери Кариб денгизи ва Тинч океанининг шарқий қисмидаги халқаро сувларда 20 дан ортиқ операция ўтказилди, оқибатда 80 дан ортиқ киши ҳалок бўлди. Трамп бу ҳаракатларни “наркокартелларга қарши уруш” деб атади. БМТ экспертлари эса бу ҳужумларни ноқонуний қатл, яъни судсиз жазо сифатида баҳолади.
Нашр маълумотига кўра, ўтган ой Венесуэла кунига 900 минг баррель нефть экспорт қилган. Нефть – бу давлатнинг асосий даромад манба. Мамлакатда тасдиқланган захиралар 303 млрд баррелни ташкил этади. Бугунги кунда Америка санкциялари Венесуэланинг нефть саноатини жиддий чеклаб, давлат бюджетининг даромадларини қисқартирмоқда.
Венесуэлада Қуролли кучларга сафарбарлик эълон қилинган. Мадуро АҚШни тинчликка чақирмоқда.
