Дубайда муштлашувда иштирок этган 8 нафар Ўзбекистон фуқароси умрбодга қамалди. Бу ҳақда ТИВ матбуот хизмати хабар берди.
Қайд этилишича, 2025-йилнинг апрель ойида Дубайда оммавий муштлашувда иштирок этган 8 нафар Ўзбекистон фуқаросига 21 январь куни суд ҳукми билан умрбод озодликдан маҳрум қилиш жазоси тайинланди. Шунингдек, битта фуқарога 25 йил озодликдан маҳрум қилиш жазоси берилди.
Ҳозирда, тегишли идоралар ва дипломатик ваколатхоналаримиз томонидан вазиятни тўлиқ ўрганиш ва фуқароларнинг ҳуқуқларини ҳимоя қилиш бўйича барча зарур чоралар кўрилмоқда.
2025 йил апрель ойида ижтимоий тармоқларда Дубай шаҳридаги ёқилғи қуйиш шохобчаларидан бирида ўзбекистонликлардан иборат икки жиноий гуруҳ ўртасида тўқнашув юз бергани ҳақида хабарлар тарқалган эди. Дастлабки маълумотларга кўра, можаро оқибатида бир киши пичоқ зарбасидан вафот этган, яна бир шахс оғир аҳволда комага тушиб қолган.
Кейинчалик Ўзбекистон ТИВ мазкур ҳодисада иштирок этишда гумонланиб, 15 нафар Ўзбекистон фуқароси қўлга олинганини маълум қилган. Маҳаллий матбуот хабарларига кўра, олдиндан келишмовчилиги бўлган икки гуруҳ ёқилғи қуйиш шохобчасида тўқнаш келган. Қизил рангли Mercedes автомобильидан тушган шахсга бир неча киши югуриб бориб, уни пичоқлаган, унинг шериги эса қочишга уринган, бироқ кейинчалик ушланиб, калтакланган.
Воқеа жойига етиб келган Дубай полицияси ҳудудни ўраб олиб, иштирокчилар қолдирган буюмларни мусодара қилган. Кузатув камералари ёзувлари ва гувоҳларнинг кўрсатмалари асосида можаро тафсилотлари аниқланиб, гумонланувчилар Дубайдаги меҳмонхоналардан бирида қўлга олинган. Кейинчалик комадаги шахс ҳам вафот этиб, қурбонлар сони икки нафарга етган.
