Тошкентда вояга етмаган шахсга нисбатан босқинчилик жиноятини содир этган икки нафар шахс қўлга олинди. Бу ҳақда пойтахт ИИББ матбуот хизмати хабар қилди.
Қайд этилишича, “Қўйлиқ” кийим бозорининг орқа томонида жойлашган дарё бўйида Отабек исмли вояга етмаган шахсга нисбатан босқинчилик содир этилгани тўғрисида ИИБга хабар келиб тушган.
Тезкор қидирув тадбирлари натижасида Бектемир туманида Тошкент вилоятида яшовчи Анвар исми ҳамда андижонлик муқаддам судланган Баҳром исмли шахслар гумонланувчи сифатида қўлга олинди.
“Ўша куни Баҳром танишим билан бозорга қараб келаётган эдик, олдимиздан бола чиқиб қолди. Мен чалғитиб турган пайтимда, унинг орқасидан Баҳром урди. Қилган ишимдан минг пушаймонман. Иложи бўлса, кечиришингларни сўрайман”, деган гумонланувчилардан бири.
Ушбу шахсларга нисбатан Жиноят кодексининг тегишли моддалари билан иш очилиб, қамоқ эҳтиёт чораси қўлланган.
