АҚШда пенсионер аёл эрини қариялар уйига олиб бориб, ўша ерда отиб ўлдирди.
АҚШда 82 ёшли аёл эрини қариялар уйига олиб боргандан кейин пистолетда отиб ташлаган. Бу ҳақда WTOC хабар берди.
Жиноят 12 сентябрь куни “Престон Хелс Центр” номли қариялар уйида, Хилтон-Хед оролида содир бўлган. Ҳарриет Рекер уни қариялар уйига олиб келган қўшниси стул олиш учун чиқиб кетган вақтда отган. Қўшниси қайтиб кирганда қўлида револьвер тутган аёлни ва ерда ётган кўкрагидан отилган эрни кўрган. Гувоҳнинг сўзларига кўра, ўлаётган Деннис Рекер: “У мени отди”, — деган.
Тергов маълумотларига кўра, аёл 81 ёшли эрни ўлдиришни олдиндан режалаштирган. Уни қўлга олганда сумкасидан соғлиги ёмонлиги ва бемор эрга қараш оғирлиги ҳақида ёзилган ёзма изоҳ топилган. Худди шундай ёзувлар унинг уйидан ҳам аниқланган.
Маълум бўлишича, Деннис Рекерни соғлиғидаги муаммолар туфайли доимий парвариш талаб қилингани сабабли ҳодисадан атиги бир кун олдин қариялар уйига жойлаштиришган. Қариндошларининг айтишича, улар илгари Ҳарриетда қурол борлигини ҳеч қачон кўрмаган, шу сабаб револьвер қаердан пайдо бўлгани ҳануз сир бўлиб қолмоқда.
Ҳарриет Рекер ҳозирда Бофорт округи қамоқхонасида ҳибсда сақланмоқда, унга кафолат пули (залог) қўйиш ҳуқуқи берилмаган. Унинг қўлга олиниши маҳаллий аҳолини ҳайратга солди — уларнинг таърифлашича, Рекер жуда тинч ва меҳрибон аёл бўлган.
Аввалроқ АҚШда яна бир ноодатий ҳолат рўй берган эди: пенсионер эр хотини тайёрлаган блинчикларни емагани учун унга пичоқ билан ҳужум қилган. Эркакнинг сўзларига кўра, хотини уни вазн йиғиши учун уларни ейишга мажбурлаган, аммо ейишни хоҳламаган.
