Давлат божхона хизмати органлари фаолиятини такомиллаштириш ва божхона маъмурчилигида замонавий ёндашувларни жорий этишга қаратилган Президент фармони қабул қилинди.
Унга кўра, божхона соҳасида бир қатор янги тартиблар белгиланди.
Жумладан, 2026 йил 1 октябрдан хавф даражаси паст ҳамда ҚҚС гувоҳномаси фаол бўлган ташқи иқтисодий фаолият иштирокчиларига товарларни импорт қилишда тўланадиган ҚҚС суммаларини ўзаро ҳисобга олиш имконияти яратилади.
Шунингдек, товарлар экспортида назорат жараёнларининг рақамлаштирилиши ва такомиллаштирилиши натижасида божхона расмийлаштируви, фитосанитария сертификати, фумигация ҳамда товарнинг келиб чиқиш сертификати учун йиғим ва тўловлар миқдори 30 фоизга камайтирилади.
2027 йил 1 январдан товарларнинг божхона қийматини назорат қилиш тартиби ҳам соддалаштирилади. Хусусан, хавф даражаси паст бўлган ташқи иқтисодий фаолият иштирокчилари олиб кираётган товарларнинг божхона қиймати товарлар эркин муомалага чиқарилгандан кейин назорат қилинади.
Бундан ташқари, божхона қийматини назорат қилиш мақсадида товарлар учун қатъий божхона қийматини белгилаш тақиқланади. Божхона қиймати бўйича дастлабки қарор қабул қилиш амалиёти жорий этилади ҳамда назорат жараёнида расмий диллер ва дистрибьюторларнинг нарх маълумотларидан фойдаланиш йўлга қўйилади.
2027 йил 1 июндан эса жисмоний шахслар томонидан нотижорат мақсадларда олиб ўтиладиган товарлар бўйича ягона божхона тўлови миқдори тўланиши лозим бўлган божхона йиғимларидан кам бўлса, ушбу йиғимлар ундирилмайди.
