Россия Украинага қарши урушга африкалик эркакларни жалб қилиш учун жанубий Африка Республикаси собиқ президент Жейкоб Зуманинг қизи Дудузиле Зумадан фойдаланган. Бу ҳақда Bloomberg хабар берди.
Маълум қилинишича, айнан Дудузиле Зума орқали қарийб 20 нафар эркак июль ойида Россияга жўнаб кетган. Бу маълумотни ёлланма аскарларнинг қариндошлари ҳам тасдиқлаган. Зума уларга отасининг партиясида ишлаш учун Россияда тансоқчи сифатида ўқишларини айтган. Оқибатда улар Россия Мудофаа вазирлиги билан рус тилида тузилган шартномаларни имзолаган. Шундан сўнг эркаклар Украинадаги уруш ҳудудига жўнатилган ва август ойидан бошлаб оилалари билан алоқага чиқмай қўйган.
Дудузиле Зума WhatsApp’даги ёзишмаларда бу эркакларнинг ота-оналарини улар фронтга юборилмаслигига ишонтирган. Россияга кетганлардан бири унга ёзиб, негадир унинг ва шерикларининг банк карталари ҳамда телефонлари олиб қўйилгани ва улар ҳарбий ҳаракатлар зонасига жўнатилаётгани ҳақида хабар берган.
“Бу фронт олди чизиғи эмас. Улар шунчаки сизни қўрқитяпти”, деб жавоб берган Зума ва агар ватандошлар фронтга жўнатилса, “шахсан” аниқлашга ваъда берган.
6 ноябрь куни Жанубий Африка Республикасининг амалдаги президенти Сирил Рамафоса маъмурияти Донбассда 17 нафар фуқаролари борлигини ва улар расмийлардан ватанга қайтарилишни сўраётганини айтди. Рамафоса уларнинг Украинага қарши урушга қандай жалб қилингани бўйича тергов ўтказишни буюрди.
Зуманинг қизи аввалроқ ижтимоий тармоқларда россияпараст кампанияларда қатнашиб, Владимир Путинни қўллаб-қувватлаган, Россияда ўзи ва отасининг Путин билан тушган суратларини жойлаштирган ҳамда Рамафосани ҳақорат қилган. Ҳозирда у 2021-йилда Жейкоб Зума судга ҳурмацизлик қилгани учун қамоққа олингач юз берган тартибсизликлар даврида зўравонликни қўзғатишда айбланиб, давлатга хиёнат бўйича судланмоқда. Ўша воқеалар оқибатида қарийб 350 киши ҳалок бўлган.
- Африкалик аёлларни дрон ишлаб чиқаришга ёллаш
Россия Жанубий Африкадан келган аёлларни “Алабуга” дрон ишлаб чиқарувчи заводга ишга ёллагани ҳақида хабарлар тарқалган. Уларга касбий ўқитиш, Жанубий Африка Республикаси мезонларига нисбатан юқори маош ва лавозимда ўсиш ваъда қилинган. Шунингдек, улар ҳарбий корхоналарда ишламаслиги таъкидланган. Ёллаш жараёни BRICS Аёллар бизнес альянси ва BRICS Талабалар комиссияси орқали ҳам амалга оширилгани айтилмоқда.
“Ижтимоий тармоқларда тарғиб қилинаётган Россияда ишга жойлашиш имкониятлари ҳеч қандай давлат иштироки билан қўллаб-қувватланмайди. Биз ёшларни ҳушёр бўлишга чақирамиз”, дея август ойида ЖАР Хотин-қизлар, ёшлар ва ногиронлар ишлари вазирлиги огоҳлантирган. Мамлакат расмийлари ушбу ҳолат юзасидан тергов бошлаган.
