Истанбул прокуратураси ўйинларга пул тикиш можароси сабабли 46 кишининг ҳибсга олинганини тасдиқлади. Шу тергов доирасида 27 нафар футболчи ўз жамоаларининг ўйинларига пул тикишда гумон қилинмоқда ва яна икки клуб президенти ҳам шу сабаб ҳибсга олинган. Бу ҳақда “Hurriyet daily news” хабар берди.
Диққатга сазовор исмлардан бири Туркиянинг уч карра амалдаги чемпиони “Галатасарой”нинг юлдуз футболчиси Метеҳан Балтачи. Қолган 26 футболчи ҳақидаги маълумотлар ҳозирча сир сақланмоқда. Шунингдек, Истанбулнинг яна бир клуби “Фенербаҳче” футболчиси Мерт Ҳакан Яндаш учинчи шахслар орқали турли ўйинларга пул тикишда гумон қилинмоқда.
Бу ишда фақат футболчилар эмас, балки икки клуб президентини ҳам ҳибсга олинган. Расмийлар уларни 2023-2024 йилги мавсумда учинчи дивизион ўйинни тузатишга уринишда айбламоқда. Ҳозиргача 46 гумонланувчидан 35 нафари ҳибсга олинган.
Ноябрь ойидаёқ 6 нафар ҳакам ва биринчи дивизион “Эюпспор” клуби президенти ҳибсга олинган эди. Шунингдек, Туркия футбол федерацияси (ТФФ) яқинда 150 га яқин ҳакамни ўйинларга пул тикиш билан боғлиқ фаолиятлари учун четлатган.
