Арманистон собиқ бош вазири Овик Абрамяннинг ўғли Аргам Абрамян икки ойга ҳибсга олинди. У собиқ депутат ва Арташат шаҳрининг собиқ мери ҳисобланади. Бу ҳақда The Insider хабар берди.
Абрамян 2023 йилда одам ўлдиришга буюртма берганликда айбланмоқда. У аёлини “Христиан инжил эътиқоди” диний ташкилоти пастори С.В. билан шахсий муносабатларда гумон қилган. Шунингдек, рафиқаси ушбу пасторга катта миқдорда пул бериб келгани аниқланган.
Тергов маълумотларига кўра, Абрамян қасос олиш мақсадида қўриқчиси Г.X.га қотилликни топширган. У 2023 йил 30 апрель куни Еревандаги турар жой биноси яқинида пасторни отиб ўлдирган.
Жиноятнинг эҳтимолий ижрочисига аввалроқ қотиллик ва ноқонуний қурол муомаласи бўйича айблов қўйилган. 2024 йил апрель ойида унинг иши судга юборилган. Абрамяннинг адвокати ҳимояси остидаги шахс айбини тан олмаслигини ва жиноятга алоқадорлигига далиллар йўқлигини айтди.
Абрамян 8 август куни Арманистон Миллий хавфсизлик хизмати ходимлари томонидан ушлаган. Мамлакат омбудсмани Анаит Манасян гумондорларнинг шахсий ва оилавий ҳаётига оид маълумотларни очиқлагани учун Тергов қўмитасини танқид қилган.
Аргам Абрамян тадбиркор ва россияпараст “Фаровон Арманистон” партияси етакчиси Гагик Сарукяннинг қизига уйланган. Сарукяннинг ўзи июль ойидан бери фирибгарликни ташкил этиш ва жуда кўп миқдорда пул ювиш айблови билан ҳибсга олинган.
Суд унга тегишли цемент ва коняк заводларини бошқаришни давлатга топширган. Сарукян партияси июнь ойидаги парламент сайловларида 3,9893 фоиз овоз олди ва тўрт фоизлик чегарадан ўта олмади.
