Арманистонда Nestle компаниясининг NAN брендидаги болалар овқатининг 9700 кг миқдордаги партияси хавфли деб топилгач, йўқ қилинди. Бу ҳақда республиканинг озиқ-овқат хавфсизлиги инспекция органи маълум қилди.
Баёнотда “Nestle компаниясининг NAN брендидаги болалар овқатининг хавфли деб топилган партияси йўқ қилинди”, дейилади.
ОАВ хабарига кўра, ушбу қарор Россиядан олинган лаборатория таҳлиллари натижалари асосида қабул қилинган. Текширувлар давомида қуруқ, тез эрийдиган, сутли ва нордон сутли болалар овқатларида хавфли токсин бўлиши мумкинлиги аниқланган.
2026 йил январь ойида Nestle Россияда ҳам айрим болалар учун мўлжалланган қуруқ сут аралашмаларини ихтиёрий равишда қайтариб олган эди. Бунга ташқи етказиб берувчидан олинган хомашёда сереулид токсини мавжуд бўлиши эҳтимоли сабаб бўлган.
Компания маълумотига кўра, мазкур модданинг миқдори жуда кам ва хавф эҳтимолий характерга эга бўлган. Маҳсулотни қайтариб олиш қарори эса хавфларни камайтиришга қаратилган глобал сиёсат доирасида қабул қилинган.
