Фаластиннинг ҲАМАС ҳаракати ўз ихтиёридаги қуролларни топширишга розилигини маълум қилди. Аммо бу учун Исроил бутун Ғазодан қўшинларини олиб чиқиши керак. Қолаверса, мустақил давлат тузилиши лозим. Мазкур баёнот ташкилотнинг бош музокарачиси ва етакчиларидан бири бўлган Халил ал Ҳайя томонидан янгради. Унинг таъкидлашича, ҲАМАС Исроилнинг ҳарбий мавжудлиги ва тажовузи натижасида вужудга келган.
“Бизнинг қуролларимиз ишғол ва тажовуз билан боғлиқ. Агар ишғол тугаса, бу қуроллар давлат маъмурияти ихтиёрига топширилади“, деган у.
Халил ал Ҳайя “давлат маъмурияти” деганда нима назарда тутганини айтмади. Бироқ AFP агентлиги ҲАМАС сиёсий бюросига сўров юбориб, ташкилот етакчиси суверен ва мустақил Фаластин давлатини назарда тутганини аниқлади.
Ал Ҳайя, шунингдек, Ғазо секторига халқаро контингент жойлаштирилиши масаласига ҳам тўхталди. Унинг сўзларига кўра, агар халқаро контингентдан мақсад ҲАМАСни қуролсизлантириш бўлса, ташкилот бундай қадамга қатъиян қарши чиқади. Фаластинликлар бунинг ўрнига Исроил билан чегара бўйлаб БМТ тинчликпарвар кучлари жойлаштирилишига эришмоқчи.
ҲАМАС деярли барча исроиллик асирларнинг жасадларини қайтариб берди. Бу Дональд Трамп томонидан илгари сурилган тинчлик режасининг биринчи босқичида белгиланган эди. Эндиликда томонлар кейинги босқич устида ишлай бошлади. Хусусан, Оқ уй омонат сулҳ бузилмаслиги учун жараённи тезлаштирмоқчи. Аммо ҲАМАСни қуролсизлантириш масаласи атрофида жавобсиз саволлар кўп.
