Бугун, 6 апрель куни Ўзбекистон Президенти Администрацияси раҳбари Саида Мирзиёева АҚШнинг Жанубий ва Марказий Осиё бўйича махсус вакили, элчи Сержио Гор билан АҚШнинг Флорида штатидаги Президент Дональд Трампнинг Мар-а-Лаго қароргоҳида ушрашди.
Мирзиёеванинг таъкидлашича, яқин кунларда Вашингтонда икки давлат ўртасида музокаралар бўлиб ўтиши режалаштирилган.
“АҚШ Президентининг Жанубий ва Марказий Осиё бўйича махсус вакили, элчи Сержио Гор билан Мар-а-Лагода учрашганимдан мамнунман. Самимий меҳмондўстлик ва илиқ қабул учун чин дилдан миннатдорлик билдираман. Бўлиб ўтган мазмунли ва конструктив мулоқотни юксак қадрлайман ҳамда яқин кунларда Вашингтонда самарали учрашувлар ўтказилишига умид қиламан”, дейилади хабарда.
Қайд этиш жоиз, Шавкат Мирзиёев 2025 йилнинг 6-7 ноябрь кунлари АҚШга борган эди. Ўзбекистон етакчиси Қўшма Штатлар Президенти Дональд Трамп билан музокаралар ўтказди, Марказий Осиё мамлакатлари ва АҚШ етакчиларининг С5+1 форматидаги саммитида иштирок этди. Шундан сўнг Америка – Ўзбекистон ишбилармонлар ва инвестициялар кенгаши ташкил этилди. Кенгаш фаолиятини Ўзбекистон томонидан Президент Администрацияси раҳбари Саида Мирзиёева ва АҚШ Президентининг Жанубий ва Марказий Осиё бўйича махсус вакили Сержио Гор бошқариб боради. Президент Администрацияси раҳбарининг собиқ ўринбосари Комил Алламжонов эса Ўзбекистоннинг АҚШдаги элчихонаси маслаҳатчи-элчиси – Президент Администрациясининг АҚШдаги вакили лавозимига тайинланди.
