Кувайтнинг F/А-18 қирувчи самолёти Эронга қарши ҳарбий операцияда иштирок этаётган АҚШнинг учта F-15 самолётини адашиб уриб туширди. Бу ҳақда ҳодисанинг дастлабки ҳисоботлари билан таниш учта манбага таяниб, The Wall Street Journal хабар берди.
Манбаларнинг айтишича, учувчи иттифоқчи самолётларни нишон сифатида аниқлаган ва уларга учта ракета учирган. Ҳужумга учраган F-15 экипажининг барча олти нафар аъзоси катапулта қилишга муваффақ бўлган. Улар ҳодиса жойидан эвакуация қилинган ва ҳозирда аҳволи барқарор.
Бу воқеадан бир оз олдин бир нечта Эрон дрони Кувайтнинг ҳаво ҳужумидан мудофаа тизимини ёриб ўтган. Улардан бири фуқаролик портида жойлашган вақтинчалик тезкор марказга ҳужум қилган, натижада олти нафар америкалик ҳарбий ҳалок бўлган.
WSJ манбаларига кўра, бу пайтда Кувайт кучлари энг юқори жанговар шайлик ҳолатида бўлган. Радарлар яқинлашаётган самолётларни аниқлагач, уларга қарата ўт очилган.
АҚШ Қуролли кучлари Марказий қўмондонлиги (CENTCOM) “дўстона ўт очиш” туфайли учта F-15E Strike Eagle қирувчи самолёти уриб туширилганини тасдиқлаган. Ҳодиса фаол жанговар ҳаракатлар пайтида содир бўлгани айтилмоқда.
“Ҳодиса Эрон авиацияси, баллистик ракеталар ва дронлар ҳужумларини ўз ичига олган фаол жанговар ҳаракатлар пайтида содир бўлган”, дейилади баёнотда.
АҚШ Кувайт мудофаа кучларига операцияни қўллаб-қувватлагани учун миннатдорлик билдирган. Иккала давлат ҳодисани тергов қилишда ҳамкорлик қилмоқда.
