АҚШ Президенти Дональд Трамп Россияга қарши “ҳалокатли” санкцияларни ўз ичига олган қонун лойиҳасини қўллаб-қувватлади ва унга Эрон ҳам қўшилиши мумкинлигини айтди. Бу ҳақда “Reuters” хабар берди.
Трампнинг айтишича, Россия билан бизнес қиладиган ҳар қандай давлат жуда қаттиқ санкцияларга дучор бўлади. Унинг сўзларига кўра, бу ҳужжатга Эрон ҳам қўшилиши мумкин.
Гап сенатор Линдси Грэм ва Ричард Блументал томонидан 2024 йилнинг апрель ойида таклиф қилинган қонун лойиҳаси ҳақида кетмоқда. У қонун лойиҳаси қуйидагиларни назарда тутади:
- Россия билан савдо қилаётган давлатлардан импорт қилинадиган товарларга 500 фоизлик бож жорий этиш;
- Бу божлар Россия Украинага нисбатан узоқ муддатли тинчликка рози бўлмагунча амал қилади;
- Товарларга нефть, газ, уран ва бошқа маҳсулотлар киради.
АҚШ Молия вазирлиги шуни маълум қилдики, агар “ҳалокатли санкциялар” кучга кирса, Россия АҚШга экспорти тақиқланган маҳсулотларни бошқа бозорлар орқали диверсификация қилади.
Сенаторлар бу чораларни 2025 йилнинг июнь ўрталарида бўлиб ўтган G7 саммитидан олдин қабул қилишни режалаштирган эди. Бироқ қонун лойиҳасининг кўриб чиқилиши Трампнинг Россия–Украина можаросини ҳал қилиш ҳақидаги баёнотлари ортидан вақтинча тўхтатилган.
2025 йилнинг октябрь ойида сенатдаги республикачи етакчи Жон Тюн бу ташаббус Трампнинг Россия Президенти Владимир Путин билан учрашуви ўтказилгунга қадар “паузага қўйилганини” айтган. Трамп ва Путин 16 октябрь куни телефон орқали гаплашиб, учрашишга келишиб олган, у Будапештда ўтиши кутилган эди, аммо аниқ сана белгиланмаган эди.
Бир ҳафтадан кейин Трамп учрашувни бекор қилганини маълум қилди.
“Биз керак бўлган натижага эриша олмаслигимизни ҳис қилдим. Шунинг учун уни бекор қилдим. Аммо келажакда бу учрашувни амалга оширамиз”, деган эди Трамп.
Путин эса бу учрашув бекор қилинмаган, балки фақат “кейинга сурилганини” айтди.
Сенатор Тюн республикачилар қонун лойиҳасини овозга қўйишга тайёрлигини, аммо буни Оқ уй билан мувофиқлаштириб амалга оширишларини маълум қилган.
ОАВнинг ёзишича, ушбу қонун лойиҳасининг қабул қилиниши АҚШнинг асосий савдо ҳамкорлари, жумладан, Европа билан муносабатларига путур етказиши мумкин.
