Жорий йилнинг 5 октябрь куни янги “Бишкек Арена” стадионининг расмий очилиш маросими бўлиб ўтди. Соат 18:00 дан ярим кечагача Қирғизистон, Қозоғистон, Ўзбекистон, Россия ва АҚШ санъаткорлари иштирокида бепул концерт бўлиб ўтди.
Томошабинлар соат 16:00 дан бошлаб кела бошлашди. Жанубий магистраль қисман ёпилгани сабабли одамлар стадионгача бўлган йўлнинг бир қисмини пиёда босиб ўтишларига тўғри келди. Меҳмонларни ташиш учун шаҳар автобуслари жалб этилди. Ушбу кунда мактаб ўқувчилари, талабалар ва давлат хизматчиларининг бир қисми масофавий иш/ўқиш форматига ўтказилди.
Соат 19:00 да Эминем композицияси садолари остида саҳнага Президент Садир Жапаров кўтарилган. Мамлакат раҳбари сўнгги олти йиллик иш якунларини сарҳисоб қилган, шундан сўнг асосий концерт дастури бошланган.
Саҳнада Jax 02.14, Freeman 996, Malika Dina, Yenlik, Азат Раимбердиев, DADO, Бек Борбиев ва Бахтиёр Тоқторовлар чиқиш қилган. Борбиевнинг “Мен сени сүйөм” ва Токторовнинг “Буй-буй” қўшиқларини санъаткорлар билан бирга бутун арена куйлаган.
Концертнинг ёшлар учун мўлжалланган қисмини Бегиш, Elman, Sadraddin, Bakr, Shiza ва Uluukmanapo давом эттирган. Sadraddin’нинг чиқиши вақтида хонандани тасвирга олаётган операторлардан бири саҳнадан йиқилиб тушган. У жароҳат олмаган.
Сўнгра саҳнага афсонавий “Дос-Мукасан” ва “Ялла” гуруҳлари чиққан. “Той жыры”, “Мусиқали чайхана” ва “Учқудуқ” қўшиқлари остида турли авлод вакиллари бўлган томошабинлар рақсга тушган.
“Ирина Кайратовна” гуруҳининг чиқиши кечанинг энг жўшқин лаҳзаларидан бирига айланган. Уларнинг ортидан Қайрат Нуртас чиққан. “Суранат” қўшиғини ижро этиш жараёнида унга Мирбек Атабеков қўшилган. Уларнинг биргаликдаги чиқиши оқшомнинг энг ёрқин вазиятларидан бири бўлган.
Атабеков ўз ижросини “Жалынам”, “Күндер жаңырар” ва “Кечки Бишкек” хитлари билан давом эттирган. Унинг қўшиқлари остида томошабинлар рақсга тушган, баъзи ёшлар эса тўғридан тўғри аренада ўз севгилиларининг қўлини сўраган. Хонанда, шунингдек, 2027 йилнинг баҳорида ушбу ерда яккахон концерт ўтказиш нияти борлигини эълон қилган.
Кечанинг хедлайнери Party Rock Anthem ва Sexy and I Know It хитларини ижро этган АҚШнинг LMFAO лойиҳаси бўлган.
Пойтахт мэрияси маълумотларига кўра, концертга 60 мингдан ортиқ киши ташриф буюрган. Очилиш маросими улкан мушакбозлик билан якунланган.
