Германияда уч нафар ўғри қудуқ орқали маҳаллий Волксбанк филиалининг ертўласига кириб, 14 та сейфни бузиб, талон-торож қилди. Бу сўнгги икки ой ичида содир этилган бешинчи банк талончилиги ҳисобланади. Бу ҳақда Deutsche Welle хабар берди.
Етказилган зарар миқдори ҳозирча номаълум, чунки сейфларда нима сақланиши банк сири ҳисобланади. Талончилик вақтида жиноятчилар Блокенер кўчасидаги бино ертўласига номаълум суюқлик сепган. Тахмин қилинишича, айнан шу модда сабаб филиал ходимлари соат 15:30 лар атрофида ўзларини ёмон ҳис қилиб, кўнгил айнишидан шикоят қилган.
Воқеа жойига ўт ўчирувчилар ва шифокорлар етиб келиб, икки нафар ходимга ёрдам кўрсатган. Банк биноси эвакуация қилинган. Текширув натижасида хонада хавфли моддалар миқдори меъёридан ошгани аниқланмаган.
Ўғрилар кўк комбинезонларда бўлгани тахмин қилинмоқда. Гувоҳлар уларни банк биносидан қора автомобиль томон ҳаракатланаётганини кўрган. Улар машинага ўтирганми ёки ёнидан ўтиб кетганми номаълум. Полиция уларни қидирмоқда.
Германияда банк талончиликлари
2025 йил 17 декабрда Бонн марказидаги Спаркассе банки филиалида иккита сейф бузиб очилган. Улардан катта миқдордаги қимматбаҳо буюмлар, асосан олтинлар ўғирланган. Полиция жиноятда банкнинг 22 ёшли собиқ ходимини гумон қилмоқда. Унинг уйида тинтув ўтказилиб, полиция бўлимга олиб борилган, бироқ ҳибсга олиш учун асос топилмагани сабаб қўйиб юборилган.
29 декабрь куни эрталаб Спаркассе банкининг Гелзенкирхен шаҳридаги бўлимининг хавфсизлик хизмати банк омборида пул, олтин ва бошқа қимматбаҳо буюмлар солинган 3200 га яқин сейфга бузиб кирилганини аниқлаган. Жиноятчилар қўшни автотураргоҳдан деворни тешиб кирган.
Айрим маълумотларга кўра, зарар миқдори 100 миллион евродан ошиши мумкин. Бу Германия тарихидаги энг йирик талончиликлардан бири сифатида баҳоланмоқда. Терговчилар эҳтимол жиноятчиларга тегишли бўлган автомобиль рақамларини аниқлаган. Ҳозирда полиция минглаб жабрланганларни сўроқ қилмоқда.
30 декабрь куни Ҳалле шаҳрида вокзал яқинидаги банк филиалида номаълум шахслар тўртта сейфни бузиб очган. 29 январь куни эса Вилгелмшафен шаҳридаги Спаркассе филиалида 18 та сейф талон-тарож қилинган. Терговчилар ушбу жиноятлар ўртасида боғлиқлик бор-йўқлигини аниқламоқда.
