Яманда Саудия Арабистони бошчилигидаги коалиция кучлари ва Жанубий ўтиш кенгаши (ЖЎК) сепаратистлари ўртасидаги қарама-қаршилик кескинлашмоқда. Коалиция авиацияси мамлакат жанубидаги Ал-Дале вилоятига ҳаво ҳужумлари уюштирди, оқибатда 4 киши ҳалок бўлди. Бу ҳақда TRT World хабар берди.
AFP агентлигининг шифохоналардаги манбаларига таяниб хабар беришича, Ал-Дале вилоятидаги Ал-Наср ва Ал-Тадамон касалхоналарига камида тўрт нафар ҳалок бўлган тинч аҳоли вакиллари ва олти нафар ярадор олиб келинган.
Коалиция матбуот котиби Турки ал-Малкийнинг 7 январь кунги баёнотига кўра, ушбу “чекланган профилактик зарба” ЖЎК етакчиси Айдарус ал-Зубайдийнинг ҳарбий тажовузини тўхтатиш мақсадида амалга оширилган.
Бу қарама-қаршиликка ал-Зубайдийнинг Саудия Арабистонига боришдан бош тортгани сабаб бўлган. Унга 4 январь куни 48 соат ичида Ар-Риёдга бориш ва президентлик кенгаши раҳбари Рашад ал-Алимий билан Ҳадрамаут ҳамда Ал-Маҳрадаги ҳужумларни муҳокама қилиш буюрилган эди. Бироқ у Адан аэропортида бир неча соатлик кечикишдан сўнг белгиланган самолётга чиқмаган.
“Шу вақт ичида қонуний ҳукумат ва коалиция Айдарус ал-Зубайдий катта ҳарбий куч, жумладан, зирҳли жанговар машиналар, оғир ва енгил қурол-яроғ ҳамда ўқ-дориларни сафарбар қилгани ҳақида маълумот олди”, дея таъкидлади ал-Малкий.
Зарбалардан мақсад ушбу кучларни зарарсизлантириш ва низонинг Ал-Дале вилоятига ёйилишининг олдини олиш бўлгани айтилмоқда.
Жанубдаги вазият ва ички низолар
БАА томонидан қўллаб-қувватланадиган Жанубий ўтиш кенгаши собиқ мустақил Жанубий Яман давлатини қайта тиклашни мақсад қилган. Сўнгги ҳафталарда улар Ҳадрамаут ва Ал-Маҳра провинцияларини ҳукумат кучларидан тортиб олиб, ўз назоратини кенгайтирган эди.
Ямандаги ҳозирги ҳукумат (президентлик кенгаши) турли фраксиялардан иборат бўлиб, уларни фақат умумий душман — Эрон томонидан қўллаб-қувватланувчи ҳусийларга қарши кураш бирлаштириб туради. Ҳусийлар 2014-йилда пойтахт Санани эгаллаб, шимолий ҳудудларни назорат қилиб келмоқда.
Риёд ва Абу Даби ўртасидаги фарқлар
Яман масаласида Саудия Арабистони ва БАА ўртасидаги қарашлар вақти-вақти билан тўқнаш келмоқда. Чунки, Риёд Яманнинг ҳудудий яхлитлигини сақлаб қолиш тарафдори. Абу Даби эса жанубий гуруҳларни, жумладан, ЖЎКни қўллаб-қувватлаб келади. Ушбу манфаатлар тўқнашуви мамлакат жанубида тез-тез ҳокимият учун кураш ва зўравонликларнинг авж олишига сабаб бўлмоқда.
