Саудия Арабистонида ҳиндистонлик зиёратчиларни олиб кетаётган автобус ёнилғи танкери билан тўқнашиб, ёниб кетди. Ҳодиса оқибатида 45 нафар Ҳиндистон фуқароси ҳалок бўлди, фақат бир йўловчи тирик қолди. Бу ҳақда Gulf News хабар берди.
Ҳиндистондан жами 54 нафар зиёратчи 9 ноябрь куни Ҳайдарободдан Жиддага учиб келган. Улар 23 ноябрь куни ватанига қайтиши режалаштирилган эди. Зиёратчилардан тўрт нафари алоҳида машинада Мадинага йўл олган, яна тўрт нафари эса Маккада қолган. Қолган 46 киши 17 ноябрь куни Мадинага кетаётган ва ҳалокатга учраган автобусда бўлган. Улардан фақат бир киши омон қолган ва ҳозир шифохонада даволанмоқда.
Ҳиндистон бош вазири Нарендра Моди автобус ҳалокатидан “чуқур қайғуда” эканини айтди. У яқинларини йўқотган оилаларга ҳамдардлик билдириб, Ҳиндистоннинг Ар-Риёддаги элчихонаси ва Жиддадаги консуллиги барча имкониятларни ишга солаётганини таъкидлади.
