Нигериянинг Майдугури шаҳрида содир этилган қатор худкушлик портлашлари оқибатида камида 23 киши ҳаётдан кўз юмди. Бу ҳақда Deutsche Welle хабар берди.
Маълум қилинишича, 16 март оқшомида Борно штатининг маъмурий марказида юз берган ушбу ҳужумлар оқибатида яна 108 киши жароҳатланган. Ҳозирча ҳеч бир гуруҳ ушбу терактлар учун жавобгарликни ўз зиммасига олгани йўқ. Расмийлар бунда ИШИД қўли борлигини тахмин қилмоқда.
Штат полициясига кўра, портлашлар шаҳарнинг гавжум нуқталарида юз берган. Биринчи портлаш Monday market (Душанба бозори) ҳудудида, иккинчиси Майдугури университети ўқув шифохонаси дарвозаси олдида, учинчиси эса алоқа бўлими (почта) яқинида содир этилган.
“Дастлабки тергов натижаларига кўра, ушбу ҳодисалар худкуш террорчилар томонидан амалга оширилган”, дейилади штат полицияси расмий вакили Наҳум Кеннет Дасо баёнотида.
Вакилнинг қўшимча қилишича, айни вақтда воқеа жойлари қуршаб олинган ва хавфсизлик кучлари бошқа таҳдидлар йўқлигини текшириш учун ҳудудни кўздан кечирмоқда.
“Вазият тўлиқ назорат остида”, дея таъкидлади Дасо.
Ушбу қонли ҳужумлардан олдин 15 мартдан 16 мартга ўтар кечаси ҳам ҳарбий постда ҳужумлар қайд этилган эди. Расмийлар бунда ИШИДга алоқадор жангариларни айбламоқда.
Майдугури — қарийб 20 йилдан бери Боко Ҳарам ва унинг бўлинмаси бўлган ИШИД Ғарбий Африка провинцияси каби гуруҳлар фаол бўлган Борно штатининг пойтахтидир. Ушбу гуруҳларнинг мамлакатда халифалик ўрнатиш йўлидаги ҳаракатлари оқибатида ўн минглаб одам ҳалок бўлди, миллионлаб кишилар эса Нигерия шимоли-шарқидаги уйларини тарк этишга мажбур бўлди.
Таъкидлаш жоизки, Майдугури шаҳрида 2021 йилдан бери йирик терактлар кузатилмаётган эди. Бироқ шаҳардаги кўплаб назорат-ўтказиш пунктлари ва ҳарбий патруллар ҳудудда қуролли можаро хавфи ҳамон сақланиб қолаётганидан далолат беради.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
