Исроил мудофаа вазири Исроил Кац 26 март куни ЦАХАЛ кучлари тун давомида амалга оширган авиазарба натижасида Эроннинг энг юқори мартабали ҳарбий-денгиз қўмондони Алиризо Тангсирийни йўқ қилганини билдирди. Бу ҳақда The Washington Post хабар берди.
Исроил томонининг таъкидлашича, ушбу операция АҚШнинг Ҳормуз бўғозини денгиз қатнови учун қайта очиш борасидаги саъй-ҳаракатларини қўллаб-қувватлаш мақсадида амалга оширилган.
“Ислом инқилоби қўриқчилари корпуси (ИИҚК) ҳарбий-денгиз кучлари қўмондони ва бошқа юқори мартабали зобитлар муҳим сув йўлини ёпиш учун ҳарбий куч ишлатгани сабабли нишонга олинди”, деди Исроил Кац.
Ҳормуз бўғози глобал энергия таъминоти учун ўта муҳим йўлак бўлиб, дунё нефтининг қарийб 15 фоизи ва суюлтирилган табиий газининг 20 фоизи айнан шу ер орқали ўтади.
Исроил мудофаа кучлари (ЦАХАЛ) маълумотига кўра, ҳарбий ҳаво кучлари Тангсирийни Эроннинг жанубий соҳилидаги Бандар Аббос шаҳрида аниқ зарба билан йўқ қилган. Кацнинг айтишича, Тангсирий бўғозни “миналаштириш ва блоклаш”да айбланган. Вазир ушбу операцияни америкалик ҳамкорлар учун муҳим янгилик деб атади.
Ҳозирча Эрон расмийлари Тангсирийнинг ўлимини тасдиқламади. Шунингдек, ушбу зарба Эроннинг бўғозни тўсиб қўйиш қобилиятини қай даражада заифлаштириши ҳозирча номаълум.
Трампнинг огоҳлантириши
АҚШ президенти Дональд Трамп 26 март куни Truth Social тармоғида Эрон раҳбариятига қарши кескин баёнот билан чиқди. У деярли бир ойдан бери давом этаётган урушда томонлар келишувга эриша олмаса, ҳарбий эскалация янада кучайиши билан таҳдид қилди.
“Эронлик музокарачилар тезроқ жиддийроқ бўлишса яхши бўларди, акс ҳолда кеч бўлади. Агар бу содир бўлса, орқага қайтиш йўқ ва бу жуда ёмон бўлади!”, деб ёзди Трамп.
Эрон ташқи ишлар вазири Аббос Ароқчи Теҳрон ва Вашингтон воситачилар орқали хабар алмашаётганини тасдиқлади, бироқ у буни музокара деб ҳисобламаслигини билдирди.
Алиризо Тангсирий ким эди?
62 ёшли Тангсирий 2019 йилда Ҳормуз бўғозини ёпиш билан таҳдид қилгани учун АҚШ Молия вазирлиги санкцияларига тушган эди. АҚШ уни халқаро сувларда кемаларга саботаж қилиш учун масъул тузилмани бошқаришда айблаган.
У 2023 йилда ИИҚК учун дронлар ишлаб чиқарувчи қурол-яроғ компаниясига раислик қилгани сабабли такроран санкцияга учраган. Шунингдек, у дронлар ва қанотли ракеталар синовига бошчилик қилган.
24 март куни Тангсирийга тегишли экани айтиладиган ижтимоий тармоқ саҳифасида Ҳормуз бўғози орқали ўтмоқчи бўлган кемалар Эрон расмийларидан рухсат олиши шартлиги ҳақида огоҳлантириш эълон қилинган эди. Кейинги куни эса Аббос Ароқчи Эрон фақатгина дўст мамлакатлар — Хитой, Россия, Ҳиндистон, Ироқ ва Покистонга транзит учун рухсат берилганини таъкидлаган.
