Бугун, 28 февраль куни Эронга қарши АҚШ ва Исроил томонидан амалга оширилган қўшма ҳарбий операция бир неча ой давом этиши режалаштирилган. Бу ҳақда Исроил хавфсизлик манбаси 12-каналга маълум қилди.
Манбага кўра, операция икки давлат ўртасида яқин ҳамкорликда ишлаб чиқилган ва томонлар барча босқичларни олдиндан мувофиқлаштирган. Таъкидланишича, Исроил мазкур операцияда қўлидан келган барча имкониятларни ишга солади. АҚШ эса бу жараёнда тўлиқ қўллаб-қувватлайди.
Маълумотларга кўра, қўшма ҳужумнинг дастлабки босқичи тўрт кун давом этиши режалаштирилган. Хабарларга кўра, биринчи зарбалар эрталабки вақтга атайлаб белгиланган. Бу вақт танланишидан мақсад – Эрон томонини кутилмаган вазиятга солиш бўлган. Таъкидланишича, Эрон томони эҳтимолий ҳужумни асосан тунги вақтда кутган, шу боис кундузги зарбалар уларни ҳайратда қолдиришга қаратилган стратегик қадам сифатида баҳоланмоқда.
Айни пайтда, АҚШ Президенти Дональд Трамп Эрон билан олиб борилган музокаралар жараёнидан норози эканини билдирган. У Эроннинг ядровий қуролга эга бўлишига қатъиян қарши эканини яна бир бор таъкидлаб, Теҳрон уранни бойитиш имкониятига ҳам эга бўлмаслиги кераклигини айтган.
