Доғистоннинг Дербент туманида кучли ёғингарчилик оқибатида Гежух сув омборининг тўғони ўпирилди. Бу ҳақда Россия Фавқулодда вазиятлар вазирлигига таяниб “РИА Новости” хабар берди.
Сув босган ҳудудларда аҳолини эвакуация қилиш ишлари давом этмоқда. Ёғингарчилик сабаб сув омбори тўлиб кетган ва бу ҳимоя иншоотининг бузилишига олиб келган. Воқеа жойига ФВВнинг қўшимча кучлари, жумладан, 40 кишилик аэромобил гуруҳи ҳамда 5 та техника жалб этилган. Аҳоли учун вақтинчалик жойлаштириш пунктлари ташкил этилган.
Мамедқалъа қишлоғида 28 та уй сув остида қолган, 100 га яқин одам эвакуация қилинган. Қишлоқ сув омборидан пастда жойлашгани сабаб тошқин зонасига тушган. Михайловка микрораёнида ҳам кўчаларни сув босгани қайд этилмоқда. Тумандан жами 4 мингдан ортиқ кишини эвакуация қилиш режалаштирилган.
Сув сатҳи кўтарилиши фонида Мамедқалъа ҳудудидаги “Кавказ” федерал трассасидаги кўприк қулаб тушган. Ҳаракат икки йўналишда ҳам тўлиқ ёпилган. Кўприк қулашига конструкциянинг сув остида қолиб, ювилиб кетгани сабаб бўлган.
