Ўзбекистоннинг Екатеринбург шаҳридаги Бош консулхонаси ва Ташқи меҳнат миграцияси агентлиги вакиллари Тюмен вилоятининг Тоболск шаҳрида бўлиб 26 нафар ўзбекистонлик ишчининг иш ҳақи ундириб берилишини таъминлади. Бу ҳақда “Дунё” АА хабар берди.
Консулхона ва агентлик вакиллари хизмат сафари давомида 100 дан ортиқ фуқаролар билан сайёр қабул ташкил этган. Мулоқот чоғида дипломатлар консуллик-ҳуқуқий ёрдам кўрсатиб, паспорт расмийлаштириш ва миграция қонунчилигига риоя қилиш бўйича тушунтиришлар бердилар. Шунингдек, турли ёт ғоялар таъсирига тушиб қолмаслик, огоҳ бўлиш ва ҳарбий компаниялар сафига ёлланиш жиноий жавобгарликка сабаб бўлиши ҳақида алоҳида уқтирилди.
Мурожаатлар асосида ўтказилган ўрганишлар натижасида “САДКОМ” МЧЖ томонидан 26 нафар ўзбекистонликнинг февраль ва март ойлари учун иш ҳақи асоссиз равишда ушлаб қолингани аниқланди. Мазкур ҳолат ўрганилиб мавжуд қарздорликни бартараф этишга келишилди. 26 нафар ўзбекистонлик ишчининг жами 2 миллион рубль миқдоридаги маоши ҳисобланиб, яқин кунларда уларнинг банк ҳисоб рақамларига ўтказиб берилиши таъминланди. Бундан ташқари, аввалроқ мазкур ташкилотдан иш ҳақини ололмай кетган яна 80 нафарга яқин фуқаронинг қарздорликлари ҳам яқин ҳафта ичида тўлаб берилиши бўйича қатъий келишувга эришилди.
Бош консулхона ва Миграция агентлиги вакиллари фуқароларнинг яшаш ва иш шароитларини кўздан кечириб, иш берувчилар билан келгусида бу каби муаммолар такрорланмаслиги бўйича тушунтириш ишларини олиб борди.
