Ўзбекистонда айрим тиббиёт ходимларига уй сотиб олишга субсидия берилади.Ҳукуматнинг 2026 йил 12 июндаги 310-сон қарори билан давлат тиббиёт муассасаларида камида 15 йил иш стажига эга тиббиёт ва фармацевтика ходимларини уй-жой билан таъминлаш мақсадида ипотека кредити асосида сотиб олинадиган уй-жойнинг дастлабки бадалининг бир қисмини қоплаш тартиби тасдиқланди.
Низомга мувофиқ, фуқаро рўйхатдан ўтган ҳудудидан қатъи назар, мамлакатнинг исталган ҳудудидаги бирламчи уй-жой бозоридан ипотека кредити асосида хонадон сотиб олиши мумкин.
Субсидия олиш учун ариза Давлат хизматлари марказлари ёки Ягона интерактив давлат хизматлари портали орқали қабул қилинади.
Ариза берувчиларни баҳолаш жараёнида уларнинг амалда давлат тиббиёт муассасасида фаолият юритиши ҳамда шу муассасаларда камида 15 йиллик иш стажига эга экани тасдиқланиши шарт.
Низомга кўра, субсидия бир оилага, яъни эр ёки хотиндан фақат биттасига бир марта берилади.
Танлов тўлиқ онлайн шаклда ташкил этилади. Барча мезонларга жавоб берган иштирокчилар орасидан ҳар чорак учун ажратилган квота доирасида 125 нафар ғолиб автоматик тасодифий танлаш имкониятини берувчи «random.org» платформаси орқали аниқланади.
Субсидия ажратиш ҳақидаги хабарномани олган ғолиб ипотека кредити асосида уй-жой сотиб олиш учун қурилиш-пудрат ташкилоти билан бирламчи шартнома тузади.
