2025 йилда YouTube реклама даромади бўйича рекорд кўрсаткичга эришди. MoffettNathanson ҳисоб-китобларига кўра, платформанинг рекламалардан тушган даромади 40,4 миллиард долларни ташкил этган.
Маълум қилинишича, бу кўрсаткич илк бор Disney, NBC, Paramount ва Warner Bros. компанияларининг умумий реклама даромадидан ошди. Ушбу студияларнинг жами реклама тушуми 37,8 миллиард долларни ташкил этган.
YouTube’нинг умумий йиллик даромади эса қарийб 62 миллиард долларга етган. The Hollywood Reporter ёзишича, бу кўрсаткич Disney’нинг медиа бўлинмаси даромади — 60,9 миллиард доллардан ҳам юқори.
Таҳлилчилар YouTube’ни аллақачон “медиа бозорининг янги қироли” деб атамоқда. Уларнинг баҳолашича, платформанинг қиймати 500–560 миллиард доллар атрофида бўлиши мумкин. Таққослаш учун, энг яқин рақобатчилардан бири — Netflix’нинг бозор капиталлашуви 409 миллиард долларга тенг.
Тадқиқот компанияси MoffettNathanson прогнозларига кўра, YouTube’нинг кейинги ўсишига унинг дунёдаги етакчи видеохостинг платформаси сифатидаги мавқеи ҳамда сунъий интеллектга йўналтирилаётган сармоялар ёрдам беради.
Мутахассисларнинг айтишича, кўплаб контент яратувчилар аллақачон нейротармоқлардан фойдаланишни бошлаган. Бу контент ишлаб чиқариш жараёнини тезлаштиради ва харажатларни камайтиради.
Шу билан бирга, анъанавий медиа компаниялари телевидение аудиториясининг камайиши ва ишлаб чиқариш харажатларининг ошиши каби муаммоларга дуч келмоқда. Реклама берувчилар эса тобора кўпроқ YouTube’ни танламоқда, чунки томошабинлар, айниқса ёшлар, айнан шу платформада кўпроқ вақт ўтказмоқда.
