Тошкент вилоятининг Бекобод шаҳрида вояга етмаганлар ўртасидаги жанжал сабаб 11-синф ўқувчиси вафот этгани юзасидан 5 киши қамоққа олинди. Бу ҳақда Бош прокуратура ахборот хизмати раҳбари Ҳаёт Шамсутдинов хабар берди.
“Бекобод шаҳридаги қотиллик бўйича қўзғатилган жиноят иши доирасида жами 5 нафар гумонланувчи вояга етмаган шахсга нисбатан қамоққа олиш тарзидаги эҳтиёт чораси қўлланилди. Тергов ҳаракатлари давом этмоқда”, дейилади 12 март куни эълон қилинган хабарда.
Ҳодиса 2026 йил 5 март куни содир бўлган. Бир неча вояга етмаган шахс ўртасида келиб чиққан оғзаки жанжал давомида улардан бири ошхона пичоғи билан жабрланувчининг ўнг ва чап кўкрак қисмларига жароҳат етказган. Марҳум ўқувчининг яқинларига кўра, болалар ўзаро низолашгандан кейин бошқа мактаб ўқувчилари 5 киши бўлиб келган. Уларнинг 3 нафари шаҳардаги 3-мактабнинг, 2 нафари эса техникум ўқувчилари бўлган. Гувоҳларга кўра, вояга етмаган ўсмирлар Nexia автомобильида келган.
Ҳодиса мактаб яқинида содир бўлган, марҳум ўқиган 12-мактаб раҳбарининг айтишича, фожиа дарсдан кейин юз берган. Аммо марҳумнинг онаси унга бу ҳақда тушгача хабар беришганини билдирган.
Жабрланувчи тиббиёт муассасасига олиб борилган бўлса-да, кўрсатилган тиббий ёрдамга қарамасдан вафот этган. Ҳолат юзасидан Жиноят кодексининг 97-моддаси (қасддан одам ўлдириш) билан жиноят иши қўзғатилган.
