Россиянинг Челябинск шаҳрида ўзбекистонлик эркак силовсинни безовта қилгани ортидан жаримага тортилди. Бу ҳақда “РИАМО” хабар берди.
Маълум қилинишича, ҳодиса “Мени қутқар” ҳайвонлар бошпанасида содир бўлган. Эркак қўриқланадиган ҳудудга бостириб кирган, натижада бошпана раҳбари қўриқчини чақирган ва 112 га қўнғироқ қилган. Ўзбекистон фуқароси ҳибсга олиш пайтида ўзини Интерпол пайвандчиси деб таништирган.
“Эркак воқеа жойига чақирув бўйича етиб келган қўриқлаш корхонаси ходимларига ‘Интерпол пайвандчиси’ эканини айтган ва қўлга олингани сабабли ходимларга жиддий муаммолар бўлишини ваъда қилган”, дейилади “Витяз” қўриқлаш корхонаси баёнотида.
Аниқланишича, ўзбекистонлик эркак бошпана ҳудудида ўз шеригини излаб келган. У спиртли ичимлик таъсирида бўлгани айтилмоқда. Полиция ходимлари 1982 йилда туғилган эркакка нисбатан Россия Федерацияси Маъмурий жавобгарлик тўғрисидаги кодексининг 20.1-моддаси (майда безорилик) бўйича баённома тузган.
У 500 рубль миқдорида (76 минг сўм) жаримга тортилган, эркак Россия ҳудудида қонуний асосда бўлгани маълум қилинган.
“Бу воқеадан сўнг Маруся исмли силовсин қаттиқ стрессни бошдан кечирди, бу жуда ачинарли ҳолат”, деди бошпана эгаси Карен Даллакян.
