2026 йил январ–июн ойларида Ўзбекистон ташқи савдо айланмаси 41 млрд АҚШ долларини ташкил этди. Бу ўтган йилнинг шу даврига нисбатан 2,8 млрд долларга ёки 7,4 фоизга кўпдир.
Маълумотларга кўра, экспорт 15,9 млрд доллар бўлиб, 2025 йилнинг мос даврига нисбатан 8,8 фоизга камайган. Импорт эса 25,1 млрд долларга етиб, бир йил ичида 21 фоизга ўсган.
Натижада ташқи савдо балансида 9,3 млрд долларлик манфий сальдо қайд этилди. Шу билан бирга, олтин ҳисобга олинмаган товарлар экспорти 28,7 фоизга ошиб, 8,2 млрд долларга етди. Экспорт таркибида саноат маҳсулотлари, тайёр товарлар, озиқ-овқат ҳамда кимё маҳсулотлари асосий улушни ташкил қилди.
Статистикага кўра, Ўзбекистон дунёнинг 195 дан ортиқ мамлакати билан савдо алоқаларини амалга оширмоқда.
Ташқи савдо айланмаси бўйича биринчи ўринни Хитой эгаллаб, кўрсаткич 2026 йилда 9,47 млрд долларга етган. Россия билан савдо ҳажми 7,01 млрд доллар, Қозоғистон билан 2,78 млрд доллар, Туркия билан 1,40 млрд доллар, Афғонистон билан эса 1,08 млрд долларни ташкил этган.
Шунингдек, Франция, Бирлашган Араб Амирликлари, Қирғизистон, Германия, Туркманистон, Ҳиндистон, АҚШ ва бошқа давлатлар билан ташқи савдо ҳажмида ҳам ўсиш қайд этилди.
Умумий ташқи савдо айланмасида Хитойнинг улуши 23,1 фоизни, Россияники 17,1 фоизни ташкил қилди. Кейинги ўринларда Қозоғистон, Туркия ва Афғонистон қайд этилди.
