Россия Telegram асосчиси Павел Дуровни халқаро қидирувга берди. Бу ҳақда Федерал хавфсизлик хизматининг Жамоатчилик билан алоқалар маркази хабар берди.
Дуровга “террорчилик фаолиятига кўмаклашиш” моддаси бўйича айблов эълон қўйилган. Бу айблов Украина махсус хизматлари Telegram’даги оммабоп “Дайвинчик” чатботидан гўёки ёш россияликларни “диверсион-террорчилик фаолиятига жалб этишда” фойдалангани бўйича қўзғатилган жиноят иши доирасида илгари сурилган.
Telegram маъмурияти раҳбари П. Дуровга Россия Жиноят кодексининг 205.1-моддаси 1.1-қисмида (террорчилик фаолиятига кўмаклашиш) назарда тутилган жиноят белгилари бўйича тергов қилинаётган жиноят иши доирасида айблов эълон қилди, у халқаро қидирувга берилди, дейилади ФХХ хабарида.
Идоранинг таъкидлашича, 2025 йил июль ойидан бошлаб Москва, Петербург ва бошқа шаҳарларда 12 ёшдан 22 ёшгача бўлган 46 нафар Россия фуқароси қўлга олинган, улар чатбот орқали ёлланган. ФХХ улар “Украина махсус хизматлари топшириғига биноан” ҳуқуқ-тартибот идораларига ҳужум қилишдан тортиб транспорт ва алоқа объектларига ўт қўйишгача бўлган турли ҳаракатларни амалга оширганини билдирди.
Жиноий жавобгарликка тортиш ёшидагиларга айблов эълон қилинган ва уларга узоқ муддатга озодликдан маҳрум этиш жазоси тайинланган. ФХХ маълумотларига кўра, Украина махсус хизматлари ходимлари гўёки қизлар ниқоби остида чатда ёш россияликлар билан танишиб, улардан “кино чипталари ёки фишинг ҳаволалари орқали совғалар учун пул сўраган, кейин эса пуллар Украина Қуролли кучлари ҳисоб рақамларига тушганини билдириб, ҳужумлар ҳамда ўт қўйишларга ундаш билан шантаж қилган”.
Чатбот 2025 йил 23 декабрда тақиқланган маълумотларни ўз ичига олгани учун “Роскомнадзор”нинг тақиқланган сайтлар ягона реестрига киритилган. ФХХ Telegram мессенжери маъмурияти ушбу чатбот ва шунга ўхшаш каналларни ўчирмаганини таъкидламоқда. 205.1-модданинг 1.1-қисмига кўра, Дуров 8 йилдан 15 йилгача ёки умрбод қамоқ жазосига ҳукм қилиниши мумкин.
