Россия кеча, 19 май куни ташқи таҳдидларга жавоб беришга тайёргарлик кўриш мақсадида уч кунлик стратегик ядровий машқлар бошлади. Бу ҳақда мамлакат Мудофаа вазирлиги хабар берди.
19-21 май кунлари ўтказиладиган машқларда 64 минг нафар ҳарбий хизматчи иштирок этади ва 7 800 та ҳарбий техникадан фойдаланилади. Машқлар доирасида баллистик ҳамда қанотли ракеталар учирилиши режалаштирилган бўлиб, улар Ленинград ва Марказий ҳарбий округ ҳудудларида ўтказилади.
Мудофаа вазирлиги маълумотига кўра, машқларда юзлаб ракета мажмуалари, самолётлар, кемалар ва сувости кемалари ҳам қатнашади. Шунингдек, Россиянинг Шимолий ва Тинч океани флотлари ҳам машқларга жалб қилинган.
Ҳарбийларнинг баёнотида айтилишича, машқларнинг асосий мақсади – “тажовуз таҳдиди” шароитида ядровий кучларни тайёрлаш ва жойлаштириш бўйича ҳаракатларни синовдан ўтказишдан иборат.
