Қозоғистоннинг Бойқўнғир космодромидан 15 декабрга режалаштирилган “Протон-М” ракета ташувчисининг учирилиши кейинга қолдирилди. Бу ҳақда “Роскосмос” хабар берди.
Маълум қилинишича, ракета ташувчини учириш “камчиликларни бартараф этиш учун” қолдирилган. “Роскосмос” бош директори ўринбосари Иван Данилов “бажариладиган ишлар кўлами аллақачон белгилаб олингани”ни айтди.
“Барча тизимларнинг режали стартолди текширувлари давомида локал носозлик аниқланди”, дейилади хабарда.
Гап “Энергия” ракета-космик корпорацияси томонидан ишлаб чиқарилган ДМ туридаги тезлаткич блоки ҳақида кетмоқда. “Протон-М” ракетаси Бойқўнғирдан сўнгги бор учирилиб, орбитага “Электро-Л” гидрометеорологик сунъий йўлдошини олиб чиқиши режалаштирилган эди.
Тезлаткич блокларининг кейинги барча учиришлари фақат Восточний ва Плесецк космодромларидан амалга оширилади. “Протон” ракетаси 1960-йилларнинг ўрталаридан бери фойдаланиб келинмоқда. Келажакда унинг ўрнини “Ангара” оиласига мансуб ракеталар эгаллаши керак.
27 ноябрь куни Бойқўнғирда “Союз МС-28” космик кемасининг Халқаро космик станцияга учирилиши вақтида Россиянинг пилотли парвозлари учун ягона старт майдончаси шикастланди. Хусусан, хизмат кўрсатиш кабинаси қулаб тушган. “Роскосмос” майдонча “яқин вақт ичида” тикланишини ваъда қилган.
Мутахассисларнинг таъкидлашича, ушбу ҳодиса оқибатида Россия 1961-йилдан бери илк бор космосга одам юбориш имкониятидан маҳрум бўлган. Уларнинг баҳолашича, “Союз” ва “Прогресс” кемаларининг учирилиши номаълум муддатга қолдирилган. Чунки бошқа старт майдончаси йўқ, ҳозирги шароитда янгисини қуриш эса деярли имконсиз.
