УЕФА сиёсий келишувга эришилмагунча Россияни халқаро мусобақаларга, ҳатто ўсмирлар ўртасидаги турнирларга ҳам қайтариш имконсиз, деган позицияда қолмоқда. Бу ҳақда Championat нашри хабар берди.
Бу ёндашув Халқаро Олимпия қўмитасининг (ХОҚ) сўнгги тавсияларига қарамай сақланиб қолмоқда. Аввалроқ ХОҚ Россия ва Беларусь спортчиларига ўсмирлар ўртасидаги халқаро мусобақаларда миллий байроқлари остида иштирок этишга рухсат беришни таклиф қилган ҳамда халқаро федерацияларни бу масалани кўриб чиқишга чақирган эди.
Шунга қарамай, УЕФА 2026-йилда Россия терма жамоаларини 17 ёшгача бўлган футболчилар ўртасидаги турнирларга қайтариш масаласини муҳокама қилган, бироқ кейинчалик бу ташаббусдан воз кечган.
Эслатиб ўтамиз, УЕФА ва FIFA томонидан Россия футбол иттифоқига нисбатан санкциялар 2022-йилнинг февраль–март ойларида жорий этилган эди. Маълумот учун, Россия Украинага қарши ҳарбий юришлари сабаб санкцияга учраган. Шу боис уч мавсумдан бери Россия Премьер Лигаси (РПЛ) вакиллари Еврокубокларда иштирок этмаяпти. Валерий Карпин бошчилигидаги миллий терма жамоа эса фақат ўртоқлик учрашувлари ўтказмоқда.
