Тошкент шаҳри ва вилоятида наркотик ташиш билан шуғулланган талабалар қўлга олинди. Бу ҳақда Ички ишлар вазирлиги хабар берди.
Қайд этилишича, Миробод ва Мирзо Улуғбек туманларида 1 кг 604 г турли хилдаги гиёҳвандлик воситалар тарқалишининг олди олинган. Унда 2004 йилда туғилган талаба йигит Миробод туманида 7 дона изолентага ўралган “марихуана” гиёҳвандлик воситасини “закладка” усулида жойлаштираётган вақтида ушланган. У уч ойдан буён Телеграм даги наркодўконда куратор кўрсатмасига асосан йирик миқдорда гиёҳвандлик воситаларини тарқатиш билан шуғулланиб келган. Давом эттирилган тезкор тадбирда унинг ижарадаги тураржойидан 698 г альфа ПВП, 471 г “мефедрон” синтетик гиёҳвандлик воситалари, 433 г “марихуана”, шунингдек гиёҳвандлик воситаларини қадоқлашда ишлатиладиган уч дона электрон тарози, 600 дона пакет, беш дона изолента, тўрт дона флаконда номаълум суюқлик борлиги аниқланиб, ашёвий далиллар сифатида ҳужжатлаштириб олинган.
Навбатдаги ҳолатда интернет наркодўкон жиноий гуруҳ фаолиятига чек қўйилган. Жумладан, Тошкент шаҳар Яккасарой туманида жойлашган меҳмонхона ёнида шубҳали ҳаракатланган 2001 йилда туғилган наркошоп администратори ҳамда 1998 йилда туғилган шериги йўлда тўхтатиб текширилганда ёнида альфа ПВП синтетик гиёҳвандлик ва уч дона “тропикамет” кучли таъсир қилувчи дори воситалари ҳамда гиёҳвандлик воситаларини истеъмол қилишда фойдаланиладиган мосламалар борлиги аниқланган.
Тезкор қидирув тадбирлар натижасида Қибрай туманида тезкор тадбир ўтказилиб, 2005 йилда туғилган қизнинг яшаш хонадони кўздан кечирилган. Хонадондан беш дона “тропикамет” кучли таъсир қилувчи дори воситалари аниқланган. Тезкор тадбир давом эттирилиб, муқаддам Жиноят кодексининг 165-(товламачилик) ва 273-моддалари (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан судланган интернет нарко дўкон оператори яшаш хонадони кўздан кечирилган ва 80 грам альфа ПВП, “мефедрон”, суюқ ҳолатдаги альфа ПВП синтетик гиёҳвандлик воситалари, “пригобалин” кучли таъсир қилувчи дори воситалари, электрон тарози ва зип пакетлар, магнитлар ашёвий далиллар сифатида ҳужжатлаштириб олинган.
Тезкор кузатув вақтида ушбу хонадондан чиқиб келаётган 2004 ва 2006 йилда туғилган “закладчик” талабалардан тарқатиш учун тайёрлаб қўйилган 30 дона изолентага ўралган альфа ПВП синтетик гиёҳвандлик воситалари борлиги аниқланган. Тезкор қидирув тадбирлар давомида интернет наркодўкон жиноий гуруҳ аъзолари қўлга олинган.
Мазкур ҳолат юзасидан жиноий гуруҳга нисбатан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан ҳамда 251-1-модда (Гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) 2-қисми билан жиноий иш қўзғатилган.
