Фарғонада далага кўмиб кетилган 7 кг “гашиш”ни олаётган трансмиллий жиноий гуруҳ аъзолари қўлга олинди. Бу ҳақда Ички ишлар вазирлиги хабар берди.
Қайд этилишича, Ички ишлар вазирлиги тезкор қидирув департаменти ва унинг ҳудудий бўлинмалари, шунингдек, Давлат хавфсизлик хизмати ходимлари ҳамкорлигида ўтказилган тезкор қидирув тадбири натижасида Фарғона вилояти Данғара туманида жойлашган далаларнинг бирида яшириб кетилган 7 кг “гашиш”ни муқаддам жиноят кодексининг 109-моддаси билан судланган 1995 ва 1982 йилда туғилган шахслар олган вақтида ушланган.
Билдирилишича, фуқаролардан бири 2024 йилдан буён қўшни республикалар ҳудуди орқали трансмиллий жиноий уюшма аъзолари билан ҳамкорликда катта миқдордаги гиёҳвандлик воситалари савдоси билан шуғулланиб келган. Олиб борилган тезкор қидирув тадбирлар натижасида аниқланишича, “гашиш” гиёҳвандлик воситасини жиноий уюшма аъзолардан бири келишилган геолокацияда қолдириб кетган.
Кейинчалик эса ушланган шахслар ушбу манзилга бориб гиёҳвандлик воситасини қазиб олган. Ўтказилган тезкор тадбир натижасида 7 кг “гашиш” истеъмолдан олинган. Мазкур ҳолат юзасидан наркожиноий уюшма аъзоларига нисбатан Жиноят кодексининг 273-моддаси 5-қисми билан жиноий иш қўзғатилган.
