ДХХ Чегара қўшинлари томонидан гиёҳвандлик воситалари ҳамда кучли таъсир қилувчи дори воситаларининг давлат чегараси орқали ноқонуний айланишига қарши курашиш йўналишида ИИВ Жиноят қидирув департаменти ва божхона органлари билан ҳамкорликда тезкор тадбир ўтказилди.
Аввалдан кузатувга олинган, 1994-йилда Андижон вилоятида туғилган шахснинг Тошкент шаҳрида ижарада яшаётган хонадонида чет элдан ноқонуний олиб кирилган психотроп моддаларни сақлаб келаётгани ҳақида маълумот олинган.
Кўриб чиқиш жараёнида унинг хонадонидан тахминий қиймати 1,5 миллиард сўмлик 15 330 дона “Прегабалин” кучли таъсир қилувчи моддалари аниқланиб, тегишли тартибда расмийлаштирилди. Шунингдек, ётоқхона қисмида сақланаётган умумий қиймати 100 миллион сўмлик, сифати тасдиқланмаган 3 турдаги жами 2 872 дона дори воситалари, қутилар ва йўриқномалар ҳам топилди.
Дастлабки сўровда ушбу шахс дориларни Ҳиндистондан ноқонуний йўл билан олиб кирилгани ва уларни пойтахтда мижозларга сотишни режа қилганини билдирган.
Ҳолат юзасидан унга нисбатан Жиноят кодексининг 251¹-моддаси 5-қисми билан жиноят иши қўзғатилди ва “қамоқ” эҳтиёт чораси қўлланди. Ҳозирда тергов ҳаракатлари олиб борилмоқда.
