Фарғона вилояти, Бувайда тумани ҳокими ўринбосари Саидали Хидиров Экология қўмитаси инспектори Аҳроржон Ниёзовга куч ишлатиб, Миллий гвардия ходимлари ёрдамида туман ИИБга олиб кетди. Бу ҳақда Экология ва иқлим ўзгариши миллий қўмитаси раиси маслаҳатчиси Расул Кушербоев маълум қилди.
Расул Кушербоевнинг айтишича, аҳоли мурожаатига, асосан, ҳолат жойига тезкор етиб борган Экология қўмитаси инспектори ноқонуний дарахт кесиш ҳолатини аниқлаган.
Уни тўхтатиш ва белгиланган тартибда ҳужжатларни расмийлаштирмоқчи бўлган. Бироқ унинг қонуний ҳаракатига зўравонлик йўли билан қаршилик қилинмоқда, деди у.
Мазкур ҳолат юзасидан Фарғона вилояти ИИБ Ахборот хизматининг маълум қилишича, Бувайда тумани Экология бўлими инспекторини ИИБга олиб келинганлиги бўйича ахборот ҳақиқатга тўғри келмайди.
Ҳозирда Фарғона вилоят ҳокимияти ҳамда ҳуқуқни муҳофаза қилувчи органлари томонидан тузилган ишчи гуруҳ томонидан Бувайда тумани ҳокимлиги вакилларининг хатти-ҳаракатларига ҳуқуқий баҳо бериш бўйича ўрганиш ишлари олиб борилмоқда, дейилади хабарда.
