Қирғизистон парламенти – Жогорку Кенешнинг собиқ тўрағаси (спикер) Нурланбек Турғунбек ўғли депутатлик ваколатини муддатидан олдин топширишини маълум қилди. У бу ҳақдаги мурожаатини ўзининг Facebook’даги саҳифасида эълон қилди.
Собиқ спикер ўз баёнотида қирғизистонликларни рўза ойи бошлангани билан табриклаб, мамлакатга тинчлик, бирлик ва фаровонлик тилади. Шунингдек, у сўнгги кунларда ўзининг сиёсий фитналар ва “75 кишининг мурожаати”га гўёки алоқадорлиги ҳақида тарқалган хабарларга изоҳ берди.
“Муқаддас Рамазон ойида ва Худо олдида очиқ айтаманки, менинг на фитналарга, на етмиш беш оқсоқолнинг мурожаатига имзо тўплашга алоқам бор”, дейди у.
Нурланбек Турғунбек ўғлининг сўзларига кўра, жамоатчиликда резонанс келтириб чиқарган мактуб у Туркияга сафар қилган вақтда ОАВда эълон қилинган ва у бу ҳақда кейинроқ хабар топган.
Собиқ спикернинг айтишича, у сўнгги пайтларда соғлиғи ёмонлашиб, даволанаётган бўлган. Шу муносабат билан у депутатлик мандатини муддатидан олдин топшириб, сиёсатдан кетишга, соғлиғини тиклаш ва шахсий ишларига эътибор қаратишга қарор қилган.
У ўз сайловчиларига ишонч учун миннатдорлик билдирган ва парламентдан муддатидан олдин кетаётгани учун узр сўраган. Нурланбек Турғунбек ўғли ўзи раҳбарлик қилган даврда Жогорку Кенеш томонидан мамлакат учун муҳим қонунлар ишлаб чиқилгани, барча қарорлар давлат ва халқ манфаатлари йўлида қабул қилинганини қайд этди.
Сўзининг якунида у қирғизистонликларни бирдамлик ва сиёсий барқарорликка чақириб, барча воқеаларга якуний баҳони вақтнинг ўзи беришига ишонч билдирган.
Эслатиб ўтамиз, аввалроқ бир қатор жамоат арбоблари ва амалдорлар давлат раҳбари Садир Жапаров ҳамда Жогорку Кенеш спикери Нурланбек Турғунбек ўғли номига мамлакатда зудлик билан янги президентлик сайловларини ўтказишни сўраб, мурожаат йўллаган эди. Ҳужжатни 75 киши имзолаган. Кейинроқ улардан беш нафари ҳуқуқ-тартибот идоралари томонидан қўлга олинган.
Шундан сўнг Миллий хавфсизлик давлат қўмитаси (МХДҚ) раҳбари Қамчибек Ташиев лавозимидан озод этилди. Президент ўз қарорини изоҳлар экан, бу “75 кишининг мурожаати” муаллифларининг хатти-ҳаракатлари билан боғлиқлигини айтган. Шунингдек, Жогорку Кенеш спикери Нурланбек Турғунбек ўғлининг эҳтимолий истеъфоси ҳақида хабарлар тарқалган, бироқ парламент бу маълумотни рад этганди.
Бироқ МХДҚ раҳбари истеъфосидан икки кун ўтгач, Нурланбек Турғунбек ўғли спикерлик лавозимини ўз ихтиёри билан тарк этишини маълум қилди.
