АҚШ Президенти Дональд Трамп журналистнинг вояга етмаганларни фоҳишаликка мажбур қилганликда айбланган молиячи Жеффри Эпштейн иши бўйича қолган ҳужжатларни нима учун эълон қилмаётгани ҳақидаги саволига жавобан “жим бўл, чўчқа” деб жавоб берди. Бу ҳақдаги савол кеча, 18 ноябрь куни Air Force One бортида берилган.
Ҳодиса АҚШ Президентининг Флоридага йўл олаётган самолёти бортида содир бўлган. “Bloomberg” мухбири Трампдан нима учун Эпштейннинг қолган файлларини эълон қилишни истамаётгани ҳақидаги позициясини сўраган. Бунга жавобан Америка раҳбари журналистга жим туришни буюрган ва уни “жим бўл, чўчқа” сўзлари билан ҳақорат қилган.
Шу билан бирга, Трамп Air Force One бортида журналистлар билан суҳбатлашаркан, яна бир бор Эпштейн иши доирасида собиқ президент Билл Клинтон, АҚШнинг собиқ молия вазири Ларри Саммерс ва марҳум молиячи билан вақт ўтказган бошқа шахслар тилга олинганини айтган.
“The Telegraph” хабарига кўра, Трампнинг бу сўзлари турли ташкилотлар томонидан танқидга учраган.
“АҚШ Президенти шундай қилади. У матбуот ва ўзи бошқариши керак бўлган катталар билан шундай мулоқот қилади. Америка бундан яхшисига лойиқ!” деб баёнот берган чап қанотга мансуб Occupy Democrats ташкилоти.
Яна бир сиёсий гуруҳ Really American содир бўлган воқеани “жирканч лаҳза” деб атаб, Трампни “ҳурматсиз ва лаёқатсиз инсон” деб таърифлаган.
Маълумот учун, Жеффри Эпштейн 2019 йилнинг 6 июлида Нью-Йорк штати ҳуқуқ-тартибот идоралари томонидан ҳибсга олинган. Прокуратуранинг таъкидлашича, у 2002-2005 йилларда ўзининг Манхэттендаги уйига ўнлаб вояга этмаган, энг кичиги 14 ёшда бўлган қизларни олиб боргани ҳақида далиллар бор. Эпштейннинг дўстлари ва танишлари орасида нафақат АҚШда, балки бошқа кўплаб мамлакатларда амалдаги ва нафақадаги амалдорлар (шу жумладан собиқ давлат раҳбарлари), йирик тадбиркорлар ва шоу-бизнес юлдузлари бор эди. 2019 йил 10 августда қамоқхона камерасида ўз жонига қасд қилгандан сўнг, АҚШда молиячига нисбатан жиноий таъқиблар тугатилди.
