Ўзбекистонлик ҳаваскор боксчи ва 2024 йилги Париж Олимпиадаси чемпиони Абдумалик Ҳалоков вазн тоифасидан қатъи назар (P4P) дунёнинг энг яхши ҳаваскор боксчисига айланди. Бу ҳақда “BoxRec” портали хабар берди.
Янгиланган рейтингда енгил вазн тоифасида иштирок этаётган ўзбекистонлик Олимпиада чемпиони Абдумалик Ҳалоков етакчилик қилмоқда. Россиялик оғир вазн вакили Муслим Ҳожимагомедов иккинчи, яна бир россиялик Всеволод Шумков эса учинчи ўринни эгаллаган.
Кучли бешликдан Украина вакили, Олимпиада чемпиони Александр Хижняк ҳамда ўзбекистонлик боксчи Фазлиддин Эркинбоев ҳам ўрин олган. Эркинбоев рейтингда бешинчи поғонадан жой олган.
Ҳалоков ва Эркинбоевдан ташқари яна икки нафар ўзбекистонлик боксчи кучли ўнликка кирган. Тўрабек Ҳабибуллаев саккизинчи, Асадхўжа Мўйдинхўжаев эса ўнинчи ўринни эгаллаган.
Шу тариқа, Ўзбекистоннинг беш нафар вакили кучли 15 таликдан ўрин олган.
Кучли 15 таликда бир нафар қозоғистонлик спортчи жой олган. Абилайхон Жусупов ярим ўрта вазн тоифасида P4P рейтингида 12-ўринни эгаллаган.
