Тошкентнинг Учтепа туманида ноқонуний пиротехника воситалари савдосининг олди олинди. Бу ҳақда Ички ишлар вазирлиги хабар қилди.
Қайд этилишича, Ўрикзор бозори ҳудудида юк машинасига ортилаётган қутилар шубҳа уйғотгани сабабли текшириб кўрилганида, уларнинг ичида тақиқланган пиротехника воситаси борлиги аниқланган. Қутилар Андижондан келтирилгани маълум қилинган.
Юк автомашинадан тахминий нархи 117 миллион сўмлик жами 585 дона ноқонуний йўллар билан олиб келтирилган пиротехника воситалари топилган.
Тезкор-қидирув тадбирлари натижасида ушбу воситалар савдоси билан шуғулланишни режалаштирган шахс ҳам қўлга олинган.
“Мен муқаддам судланганман, пиротехника воситалари бўйича судланганман. Instagram орқали шу маҳсулотни топдим. Мен ўзим Навоий вилоятида савдо қиламан. Энди ёшлик қилиб қўйиб, қизиқдим. Қилган ишимдан афсусдаман”, деган ушбу шахс.
Ҳолат юзасидан тегишли ҳужжатлар расмийлаштирилиб, терговга қадар суриштирув ишлари олиб борилмоқда.
