Тошкент шаҳрида 25 апрель куни Жалойир—Сергели темир йўл бекатлари оралиғида юк поезди 22 ёшли йигитни уриб юбориши оқибатида у ҳалок бўлди. Бу ҳақда “Миллар” репортажида маълум қилинди.
Қайд этилишича, ҳодиса шанба куни тунги соат 02:00 атрофида содир бўлган. Дастлабки маълумотларга кўра, 2004-йилда туғилган йигит темир йўл участкасида поезд остида қолган. Воқеа жойида қон излари сақланиб қолган бўлиб, ҳудуд кейинчалик тозаланган.
Темир йўл кесишмасида навбатчилик қилаётган ходимнинг айтишича, воқеа вақтида Жалойир томондан келаётган юк поезди сигнал берган, кесиб ўтиш қисми ёпилган ва у поездни кутиб олиш учун чиққан.
Ходимнинг сўзларига кўра, поезд одатдагидек ўтиб кетмай, тўхтаб қолган. Шундан сўнг машинист тушиб, тахминан, 500 метр олдинда рельс устида одам бўлганини, уни кеч пайқаб қолганини ва тўхташга улгурмаганини айтган.
Гувоҳларнинг билдиришича, марҳум воқеа вақтида маст бўлган ва рельс яқинида ухлаб қолган бўлиши мумкин. Ҳодисадан кўп ўтмай воқеа жойига ички ишлар ходимлари, йўл-патрул хизмати ва бошқа масъуллар етиб келган.
Мазкур ҳолат юзасидан Тошкент транспорт прокуратураси томонидан терговга қадар текширув ҳаракатлари олиб борилмоқда. Ҳозирда ҳодисанинг барча тафсилотлари ўрганилмоқда.
