Тошкент шаҳри Юнусобод туманидаги уйда нарколаборатория ташкил қилган йигит ва қиз қамоққа олинди. Бу ҳақда Давлат хавфсизлик хизмати хабар берди.
Маълум қилинишича, Ички ишлар органлари ҳамкорлигида ўтказилган тезкор тадбирда Яшнобод туманида яшовчи, 1999 йилда туғилган, муқаддам Жиноят кодексининг 276-моддаси (гиёвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) билан судланган шахс ва Тошкент вилоятининг Қибрай туманида истиқомат қилувчи, 2006 йилда туғилган фуқаро ушланиб, улардан 507 дона “Прегабалин” ва 52 дона “Тропикамид” кучли таъсир қилувчи дори воситалари ашёвий далил сифатида расмийлаштириб олинган.
Тезкор тадбир давом эттирилиб, мазкур шахслар томонидан ижарага олинган хонадон ҳам холислар иштирокида кўздан кечирилганда ушбу манзилда нарколаборатория ташкил этилгани аниқланган. 4 кило 326 грамм кукун кўринишидаги “Прегабалин” моддаси, 200 грамм “Тропикамид” ва кучли таъсир қилувчи моддаларни тайёрлашда фойдаланиладиган 71 килограмм кимёвий моддалар, шунингдек, уларни қадоқлаш учун керак бўладиган флакон ва капсулалар ҳужжатлаштириб олинган.
“Таъкидлаш лозимки, ушбу ёшлар нарколаборатория ташкил этишлари биланоқ қўлга олиниб, сотиш мақсадида қўлбола усулда тайёрлаган кучли таъсир қилувчи моддаларни локациялар орқали мижозларга тарқатишга улгуришмади. Бу билан 208 минг дона бир маротабалик дозанинг аҳоли орасида тарқатилишининг олди олинди”, дейилади хабарда.
Ҳозирда уларга нисбатан Жиноят кодексининг 251-1-моддаси (гиёҳвандлик воситалари, уларнинг аналоглари ёки психотроп моддалар ҳисобланмайдиган кучли таъсир қилувчи моддаларни тарғиб қилувчи маҳсулотни тайёрлаш, тарқатиш, реклама қилиш, намойиш этиш ёки бундай моддаларни ёхуд заҳарли моддаларни қонунга хилоф равишда муомалага киритиш) 5-қисми билан жиноят иши қўзғатилиб, қамоқ эҳтиёт чораси қўлланилган. Бундай ноқонуний ҳаракатлар содир этган шахслар етти йилдан ўн йилгача озодликдан маҳрум қилиш билан жазоланиши мумкин.
