Ўзбекистонда 2025 йилнинг январь-ноябрь ойларида ички валюта бозорида хорижий валютага бўлган умумий таклиф ҳажми ўсиш суръати, талаб ҳажми ўсиш суръатидан бир оз юқори бўлди. Бу ҳақда Марказий банкнинг Ички валюта бозори шарҳида келтирилган.
Қайд этилишича, Хорижий валютага бўлган талаб 53,7 миллиард АҚШ долларини ташкил этиб, ўтган йилнинг мос даврига нисбатан 24 фоизга ошди. Шунингдек, таклиф ҳажми (Марказий банк операцияларини ҳисобга олмаган ҳолда) 45,6 миллиард долларга етиб, ўтган йилнинг мос даврига нисбатан 26 фоизга ўсди.
Аҳоли банкларга рекорд даражада кўп валюта сотди
2025 йил 11 ойида аҳоли тижорат банкларига 19,4 миллиард долларга тенг хорижий валюта сотди. Бу кўрсаткич ўтган йилнинг мос даврига нисбатан 1,3 баробарга кўп (2024 йилда аҳоли 14,6 миллиард доллар сотган). Январь-октябрь ойларида аҳоли тижорат банкларига 17,4 миллиард доллар сотганди.
Шу билан бирга жисмоний шахслар томонидан 10,6 миллиард доллар сотиб олинди. Ушбу кўрсаткич ўтган йилнинг мос даврига нисбатан 25 фоизга ўсди (2024 йилда фуқаролар 8,5 миллиард доллар сотиб олган).
Жисмоний шахслар томонидан хорижий валюта таклифи ҳажми талаб ҳажмидан 8,7 миллиард долларга кўп бўлди. Бу 2024 йилнинг мос даврига нисбатан 1,4 баробар кўп.
“Жисмоний шахсларларнинг банклар билан амалга оширган операцияларининг ижобий салдоси ички валюта бозорида қўшимча таклиф манбаи бўлиб хизмат қилмоқда”, дейилади Марказий банкнинг Ички валюта бозори шарҳида.
Мазкур даврда аҳолининг банкларга валюта сотувининг асосий манбаи халқаро пул ўтказмалари бўлди. 2025-йилнинг январь-ноябрь ойларида трансчегаравий пул ўтказмалари 25 фоизга ошиб, 17,3 миллиард долларни ташкил этди.
Юридик шахслар валюта таклифининг ўсиш суръати уларнинг валютага бўлган талаби ўсиш суръатидан сезиларли юқори бўлди
Марказий банкнинг Ички валюта бозори шарҳида келтирилишича, юридик шахслар томонидан чет эл валютасига бўлган талаб 2025 йилнинг 11 ойида ўтган йилнинг мос даврига нисбатан 24 фоизга ўсган бўлса, улар томонидан валюта таклифи ҳажми 35 фоизга ошди. Хўжалик юритувчи субъектларнинг экспорт тушумлари ҳисобига шаклланадиган валюта таклифи ушбу даврда 17 фоизга ошиб, 16,0 миллиард долларни ташкил этди. Мазкур экспорт тушумларининг 8,9 миллиард доллари ёки 55 фоизи ички валюта бозорида сотилди (ўтган йилнинг мос даврига нисбатан 19 фоиз ёки 1,4 миллиард долларга кўп).
