Қуёш панеллари ўрнатган 35 мингдан ортиқ ўзбекистонликка 9 ойда қанча субсидия берилгани маълум қилинди. Бу ҳақда Солиқ қўмитаси хабар қилди.
Қайд этилишича, 2025 йилнинг январь—сентябрь ойларида 35 284 нафар жисмоний шахс электр тармоқларига ўтказилган қуёш энергияси учун 153 миллиард 643 миллион сўм давлат бюджетидан субсидия олган.
Ажратилган пулларнинг энг катта қисми 42,6 миллиард сўм Хоразм вилоятига тўғри келган. Ундан кейинги ўринларни 22,4 миллиард сўм билан Қорақалпоғистон ва 15,3 миллиард сўмлик энергияни давлатга сотган Бухоро вилоятида яшовчилар эгаллади.
Жорий йилнинг илк 6 ойидаги 28 538 нафар жисмоний шахс қуёш энергиясини сотиш орқали 63 миллиард 498 миллион сўм миқдорида субсидия маблағларини олганди.
Қуёш панеллари орқали ўтказилган энергия учун пулларни “Солиқ” мобил иловасининг “Кешбек ва имтиёзлар” хизмати, “Қуёшли хонадон” бўлимидан банк картасига ўтказиб олиш мумкин. Бунда жисмоний шахсларга ишлаб чиқарилган энергиянинг ҳар бир киловатт соати учун 1000 сўмдан ажратилиши белгиланган.
