Тошкентда компьютерхонада йигит унга салом бермаган 2 нафар вояга етмаган шахсни пичоқлади. Бу ҳақда пойтахт ИИББ хабар қилди.
Қайд этилишича, 19 ёшли шахс Олмазор туманидаги компьютер клубларидан бирида унга салом бермаган 2 нафар мактаб ўқувчисига пичоқ билан жароҳат етказган.
“Нотўғри гаплашиб, нотўғри сўрашгани сабабли бир оз жаҳлим чиқди. Кейин жанжаллашиб кетдик. Мен олдимдаги пичоқ билан унинг оёғига тан жароҳати етказдим, кейин яна бир болага тиқдим”, деган гумонланувчи.
Ушбу шахснинг таниши ҳам дўстига қаттиқ гапиришгани учун жабрланувчиларни ургани ва тепганини, қилган ишидан пушаймонда эканини айтган.
Ҳолат юзасидан Жиноят кодексининг тегишли моддасига асосан иш очилиб, қамоқ эҳтиёт чораси қўлланган. Ҳозирда дастлабки тергов ҳаракатлари олиб борилмоқда.
