Қирғизистон президенти Садир Жапаров 9 ноябрь куни халққа мурожаат қилиб, ҳукумат энди давлат тўнтаришлари учун ҳеч қандай сабаб бермаслигини айтди. Бу ҳақда ”АКИпресс” хабар берди.
Унинг сўзларига кўра, айрим “ёмон ниятли гуруҳлар” муаммоларни “бўрттириб кўрсатмоқда”, одамларни қўзғатмоқда ва сайловлар вақтида “нимадир содир бўлишига” умид қилмоқда.
“Улар орасида илгари йирик коррупция ишлари бўйича қамоққа олиниб, суд қарори билан катта маблағ ёки мулкларни давлат бюджетига топширганлар; яширин схемаларини йўқ қилганимиз учун даромадидан айрилганлар; шахсий манфаатлари йўлида ғазаб билан ўч олиш учун лавозимларини тарк этаётганлар бор. Қисқаси, шахсий манфаатлари учун хафа бўлган одамлар”, деди Жапаров.
Шу муносабат билан Қирғизистон президенти “айрим фуқароларни тартибсизликка умид қилмасликка” чақирди.
“Биринчидан, биз тўнтариш учун сабаб бермаймиз. Иккинчидан, аввалги заиф давлат энди йўқ. Давлат энди кучли. Учинчидан, халқ кимни қўллаб-қувватлаш ва ҳокимият тепасида ким туриши кераклигини аллақачон яхши билади. Бундан буён тўнтаришларни фақат тушингизда кўрасиз. Талон-тарож, босқинчилик, очкўзларча бойлик орттириш истаги ва аввалгидек тўнтаришдан сўнг лавозимни эгаллаб, бойиб кетишга уринишлар — буларнинг барчаси фақат тушларингизда қолсин”, деди Жапаров.
Сиёсатчи, шунингдек, мамлакатда энди ҳайдовчилик гувоҳномасини пул эвазига сотиб олиш имкони бўлмаслигини ҳам айтди.
“Бундан буён коррупция бўлмайди! Пулга гувоҳнома сотиб олиш мумкинлигини унутинг. Энди ҳайдовчилик гувоҳномаси фақат билим, меҳнат ва ҳалоллик орқали қўлга киритилади. Бунга ҳар ким ўз билими ва тинимсиз саъй-ҳаракатлари билан эришиши лозим”, дея хулоса қилди у.
