Қирғизистон президенти Садир Жапаров мамлакат ташқи қарзини бир кунда тўлаши мумкинлигини айтди. Бу ҳақда президент нутқига таяниб 24.кг хабар берди.
Жапаров мамлакат иқтисодиёти барқарор ўсиб бораётгани, ташқи қарз ҳажми эса сезиларли даражада камайганини айтди. Унинг таъкидлашича, 2020-йилда ташқи қарз ялпи ички маҳсулотнинг 54 фоизини ташкил этган бўлса, ҳозирда бу кўрсаткич, тахминан, 25 фоиз.
“Иқтисодиёт учун ҳеч қандай хавф йўқ. Биз ташқи қарзни бир кунда тўлашимиз мумкин, лекин бу манфаатли эмас — фоизлар юқори бўлади, жарималар назарда тутилган. 2035-йилга бориб биз илгари олинган кредитлар билан муаммосиз ҳисоб-китоб қиламиз”, деди Садир Жапаров.
Қирғизистоннинг олтин-валюта захиралари 8,5 миллиард доллардан ошади, беш йил олдин улар 2 миллиард доллардан сал кўпроқ эди. Сўнгги маълумотларга кўра, Қирғизистоннинг умумий давлат қарзи 8,6 миллиард долларни ташкил этади, шундан қарийб 5,2 миллиард доллари ташқи қарзларга тўғри келади.
